Në Tiranë u zhvillua të premten ceremonia për nisjen e programit rajonal mbi forcimin e demokracisë vendore, i cili do të zbatohet me mbështetjen e Bashkimit Europian.
Në ceremoninë e organizuar ishin të pranishëm Shefi i Seksionit Politik, Ekonomik dhe Informativ, pranë Delegacionit të Bashkimit Europian në Shqipëri, Jan Rudolph, Koordinatori i Përhershëm i OKB-së dhe Përfaqësues i Përhershëm i UNDP në vendin tonëi, Brian J. Williams, menaxheri rajonal i programit, Samir Omerefendic si dhe përfaqësues nga shoqëria civile, pushteti vendor, partnerë ndërkombëtarë e institucione shtetërore.
Shefi i Seksionit Politik, Ekonomik dhe Informativ, pranë Delegacionit të Bashkimit Europian në Shqipëri, Jan Rudolph tha se nëpërmjet ReLOaD do të mbështeten 10 bashki në Shqipëri, me një grant prej 1.1 milionë eurosh.
Ndërsa Koordinatori i Përhershëm i OKB-së dhe Përfaqësues i Përhershëm i UNDP në vendin tonë, Brian J. Williams vuri në dukje se përfitues të grantit do të jenë organizatat e shoqërisë civile, të cilat do të inkurajohen për të zbatuar projekte në kuadër të strategjive të zhvillimit vendor me qëllim forcimin e demokracisë pjesëmarrëse në nivel vendor dhe përmirësimin e cilësisë së jetesës së qytetarëve.
Programi rajonal mbi Demokracinë Vendore në Ballkanin Perëndimor (ReLOaD) do të zbatohet në 6 vendet e Ballkanit Perëndimor që janë Shqipëria, Bosnja dhe Hercegovina, Kosova, ish Republika Jogosllave e Maqedonisë, Mali i zi dhe Serbia.
Objektivi i përgjithshëm i ReLOaD është të forcojë demokracinë pjesëmarrëse dhe procesin e integrimit në Bashkimin Europian në vendet e Ballkanit Perëndimor, nëpërmjet fuqizimit të shoqërisë civile, duke mundësuar pjesëmarrjen e saj aktive në vendimmarrje si dhe nxitjen dhe krijimin e një mjedisi ligjor dhe financiar inkurajues për shoqërinë civile. Programi me vlerë 10 milion euro financohet nga Bashkimi Europan në masën 8.5 milionë euro dhe 1.5 milionë euro nga pushteti vendor dhe UNDP. ReLOad zbatohet nga Programi i Kombeve të Bashkuara për Zhvillim. Kohëzgjatja e tij është 35 muaj.
Për tre vitet e ardhshme projekti synon forcimin e bashkëpunimit ndërmjet njësive të pushtetit vendor dhe shoqërisë civile në Ballkanin Perëndimor, nëpërmjet përsëritjes së modelit të suksesshëm të realizuar në Bosnjë Hercegovinë, lidhur me financimin e OSHC-ve nga buxheti i njësive të pushtetit vendor në përputhje me prioritetet vendore.
Projekti ReLOaD do të punojë me njësitë e pushtetit vendor për adoptimin e qasjeve transparente të orientuara kah zhvillimi dhe të bazuara në nivel projekti për financimin e OSHC-ve, duke patur në fokus qytetarët dhe nevojat e tyre. Ai do të ofrojë gjithashtu një platformë për bashkëpunimin e rrjetëzimin ndërmjet shtetit dhe OSHC-ve, për vendet pjesëmarrëse nga Ballkani Perëndimor, me qëllim ndarjen e eksperiencës dhe përvojave në ofrimin e shërbimeve më të mira për qyetarët.
Disa nga rezultatet që projekti ReLOaD do të arrijë në 50 njësitë e pushtetit vendore në gjashtë vendet e Ballkanit Perëndimor janë përdorimi i modeleve transparente dhe të bazuara në projetke konkrete për financimin e OSHC-ve. Po ashtu, OSHC-të do të ofrojnë shërbime të cilat adresojnë nevojat e komuniteteve vendore dhe janë në zbatim të planeve dhe strategjive vendore të zhvillimit. Programi mundëson kapacitete të fuqizuara të OSHC-ve dhe njësive të pushtetit vendor për të zbatuar skemat e grantit dhe ofruar projekte cilësore. Përmes zbatimit të prgramit do të arrihet edhe përmirësimi i bashkëpunimit rajonal, dialogut, ndarjes së praktikave më të mira ndërmjet njësive të pushtetit vendor e OSHC-ve.
ReLOaD do të promovojë sinergji ndërmjet njësive të pushtetit vendor dhe shoqërisë civile duke kontribuuar në rritjen e cilësisë së jetesës në 50 komunitete vendore të cilat priten të përfshihen dhe të kenë përfitime direkte në procese vendimmarrëse, gjithëpërfshirëse dhe transparente. Pritet që OSHC do të zbatojnë rret 200 projekte dhe do të ofrojnë shërbime të përmirësura dhe të shumëllojshme për më shumë se 38 mijë qyyetarë në nivel vendor në 6 vendet e Ballkanit Perëndimor.
a.ç
