Gjykata e Shkallës së Parë në Beograd dje ka shqyrtuar të gjitha provat në çështje e ndarjes së trashëgimisë së diktatorit Tito, që është zvarritur për më shumë se tri dekada.
“Sot të gjitha provat e marra nga gjykata janë lexuar dhe tani presim vendimin, ndoshta në fillim të vitit të ardhshëm”, tha Violeta Koçiç-Mitaçek, avokate e trashëgimtarëve të Titos.
Trashëgimtarët janë djali i tij, Misha Broz, dhe nipërit Josip, Zlativa dhe Eduard Broz. Ata dhe shteti pretendojnë marrjen e një kasaforte në Bankën Kombëtare të Serbisë që përmban mobilje të shtrenjta, koleksione pullash, monedha ari, bizhu, gurë të çmuar dhe ora të shtrenjta .
Gjithashtu edhe anëtarët e familjes mbretërore Karaxhorxheviç të Jugosllavisë gjithashtu po marrin pjesë në diskutimin e trashëgimisë, duke kërkuar asete që sipas tyre i përkisnin dinastisë.
Avokati i tyre, Zoran Zivanoviç, tha se ”ata presin gjithashtu vendimin e gjykatës vitin e ardhshëm”.
“Është e vështirë të presësh një vendim brenda 15 ditësh sepse është një çështje e madhe gjyqësore dhe kërkon shumë punë”, tha Zivanoviç.
Në pasurinë e diktatorit përfshihen edhe vilat dhe makinat e shtrenjta që i shkuan shteteve të formuara pas shpërbërjes së Jugosllavisë.
Shqiptarja.com
