Në Stokholm nisi të hënën gjyqi i tre personave të akuzuar për komplotimin e një sulmi terrorist në Suedi. Radio suedeze, duke cituar prokurorin e shtetit, tha se tre të dyshuarit kanë mbledhur reth 500 kilogramë kimikate, thika, maska të gazit dhe pajisje ushtarake.
Fotografitë e caqeve të dyshuara në Stokholm u gjetën në telefonat e tyre celularë.
Treshja, plus tre të tjerë akuzohen po ashtu për financimin e grupit militant Shteti Islamik në Siri.
Të dyshuarit, pesë uzbekë dhe një kirgiz, kanë komunikuar përmes platformave të mbyllura, tha Radio suedeze. Të gjithë ata, që jetojnë ligjërisht në Suedi, i mohuan keqbërjet. Radio suedeze tha se nuk duket se ata kanë lidhje me Rakhmat Akilov, uzbeku që ka kryer një sulm vdekjeprurës me kamion në Stokholm, në vitin 2017./a.meta
