Është mbyllur faza e parë për kreditë e buta të bashkisë, duke i hapur rrugë kështu prej 1 korrikut fazë së dytë. 2500 persona kanë mundur të fitojnë fazën e parë, të cilët kanë mundësi që deri më 31 korrik të dorëzojnë dokumentacionin e kërkuar në protokollin e Bashkisë së Tiranës.
Faza e tretë është ajo e cila përcakton dhe fituesit. Dritan Dango, Drejtor i Mbrojtjes Civile në Bashkinë e Tiranës ka bërë me dije se do të jenë 1500 persona që do të mund të përfitojnë nga skema e kredive të buta të Bashkisë, përzgjedhja e të cilëve do të bëhet nga një komision i ngritur nga Bashkia e Tiranës dhe që përbëhet nga disa drejtori.
“Kemi përfunduar fazën e parë, 4909 persona që kanë aplikuar dhe kanë fituar 2500 persona. Një pjesë është skualifikuar për mosplotësim kriteresh, kalim i kuotave të pagës minimale. Paga minimale nëse kalonte 100 mijë lekë të reja dilte nga skema sepse quhej pagë normale dhe mund të aplikonte dhe me një bankë normale për të marrë një kredi të thjeshtë. Jo vlente për një individ, ndërsa për çiftin nuk duhej të kalonte më shumë se 150 mijë lekë të reja, për familjarët ka qenë pak më e lartë sepse merret dhe pjesa e kriterit të rritjes së fëmijëve. Nëse kanë më shumë se kaq të ardhura, skualifikohen automatikisht”, deklaroi Dango.
Sa i përket vlerës së kredive, Dango sqaroi se varet nga struktura familjare dhe shtëpia që përfituesit do duan të marrin. Nëse do të jetë një çift, vlera maksimale e kredisë që do mund të përfitojnë është 71 milionë lekë të vjetra. Nëse do të jenë një familje prej 3 apo 4 personash vlera maksimale e kredisë do të jetë 105 milionë lekë të vjetra dhe nëse do të jetë një familje prej më shumë se 5 anëtarësh, vlera maksimale e kredisë do të jetë 130 milionë lekë të vjetra.
“Ne si bashki paguajmë interesin, individët që përfitojnë kredinë pagujanë 2% të taksës ose interesit. Kriteret për të paguar kredinë e butë janë optimale sepse dhe këstet janë shumë të ulëta. Pavarësisht viteve që është në varësi të individit.
Ka një vlerë minimale që fillon nga 8 mijë lekë deri në 15 mijë lekë për këstet mujore. Vlera totale e kredisë varet nga struktura familjare dhe shtëpia që do marrë. Shuma më e madhe 120 milionë lekë të vjetra, varet nga certifikata familjare dhe individi. S’mund të kërkojë 3+1 nëse është çift. Ata kanë deri në 1 vit sa shpallen fitues afat për të gjetur shtëpinë dhe për të vazhduar me bankën”, theksoi Dango.
