Nis DokuFest në Prizren
Në qytetin e Prizrenit në Kosovë nisi të shtunën në mbrëmje, DokuFest, festivali tradicional ndërkombëtar i filmit dokumentar dhe të shkurtër, i cili mbahet nga 8 deri 16 gusht. Edicioni XIV është hapur me filmin “Those Who Feel the Fire Burning”, të Morgan Knibbe, me temë migrimin, “një udhëtim të thellë personal të atyre që gjithmonë do të kenë flakën brenda vetës”. Filmi tregon luftën e njerëzve në kërkim të një jete më të mirë diku tjetër. “Diku pa kujtime. Diku pa zakone. Por ende me shpresën se gjithçka do të jetë mirë”.
“Tema qendrore e fFstivalit në këtë vit është migrimi dhe do të shënohet me një numër ngjarjesh, duke përfshirë një program filmi të kuruar në mënyrë të veçantë, diskutime në panel dhe punëtori tashmë tradicionale”, tha drejtori artistik i DokuFestit, Veton Nurkollari në ceremoninë në kinemanë “Lumbardhi”.
Të zgjedhur nga një numër rekord i mbi 3.000 aplikimeve, festivali do të prezantojë 228 filma nga 43 vende në 6 programe garuese dhe një numër të programeve speciale.
“Në të gjashtë garat e festivalit do të jenë disa emra të njohur, filmbërës të shquar dhe filmbërës që rikthehen, por gjithashtu edhe një numër i mirë i filmbërësve të rinj, ambiciozë dhe super të talentuar”, u shprehën organizatorët.
Ata kanë bërë të ditur edhe se, DokuFest do të prezantojë një numër rekord të filmave shqip nga filmëbërës që jetojnë dhe punojnë në Shqipëri, Kosovë dhe jashtë. Festivali do t’i bëjë homazh njërit ndër filmëbërësve më të mëdhenjë botëror, Albert Maysles, me shfaqjen e gjashtë filmave të tij.
DokuFest e nisi udhën e tij në vitin 2002, me shfaqjen e një numri të madh filmash dhe me pjesëmarrjen e një publiku të gjerë, artistësh nga rajoni dhe bota, duke e shndërruar qytetin historik të Prizrenit, më të madhin jugor të Kosovës pranë kufirit me Shqipërinë, edhe në një kryeqytet filmi çdo verë.
