Kryeministri Rama ka prezantuar sot grupin e punës së zyrës së bashkëqeverisjes me qytetarët dhe platformën online.
“Shqipëria që duam” është një platformë e hapur komunikimi e ndërveprimi me qytetarët që do të shërbejë për të dëgjuar në kohë reale për çështje të aktualitetit politik e qeverisës; për të diskutuar me qytetaret reforma e masa të rëndësishme dhe mundësuar ndikimin e tyre mbi politikat qeverisëse në çdo sektor e mbi punën e çdo ministrie apo institucioni të varësisë.
“Platforma Shqipëria që duam është arma e çdo shqiptari që e do Shqipërinë me shtet, punë, mirëqenie, kundër çdo zyrtari e nëpunësi që e pengon njeriun e zakonshëm në zgjidhjen e halleve e në përmbushjen shpresave e të ëndrrave të veta”, deklaron kryeministri.
Rama fton qytetarët që t’i bashkohen kësaj platforme, ku s’ka bindje e përkatësi dhe deklaron se përmes saj të gjithë do të marrin përgjigjje për çdo ankesë dhe shqetësim apo pyetje që kanë.
Kryeministri thotë se platforma do të ndihmojë qeverinë në përmirësimin e performancës së saj.
Fjala e Ramës
“Një komision i posaçëm organizator i kësaj zyre ka vlerësuar në bazë të kandidaturave, të cilat ishin shumë cilësore, kualifikimin akademik, eksperiencën profesionale, por edhe përshtatshmërinë me misionin e organizatës. Në fazën e parë u seleksionuan 120 kandidatë, u bënë intervistat përfundimtare që na sollën në këtë rezultat.
Të gjithë koordinatorët e kësaj zyre po trajnohen për procesin dhe mënyrën si do trajtohet në rubrikat e platformës çdo kërkesë, ankesë apo kontribut i qytetarëve. Më vjen mirë të nënvizoj se 25 anëtarët e kësaj organizate, e cila është një strukturë brenda shtetit dhe rrjet vullnetarësh për të shtyrë përpara një proces kaq të rëndësishëm, vijnë si profesionist të suksesshëm në sektorin publik.
Njërin prej tyre s’e kemi sot mes nesh, por të hënën i gatshëm për të filluar punën, vjen nga Indonezia. Ajo që nuk ka funksionuar deri më sot është fakti se nuk është arritur që t’u jepet njerëzve përgjigje përfundimtar për mijëra ankesat e tyre. Në këtë platformë çdo qytetar mund të realizojë atë që kërkon të realizojë. Kjo platformë krijon mundësinë që ta zgjidhësh problemin direkt. Eshtë një armë që qytetarët të luftojnë për të drejtat e tyre”, tha Rama.
***
Kryeministri i vendit Edi Rama ka bërë edhe një herë thirrje dhe ftesë të gjithëve që duan t’i bashkohen qeverisjes, përmes platformës në www.shqiperiaqeduam.al
“www.shqiperiaqeduam.al eshte mundesia e cdo shqiptari per te qene pjese e koalicionit te madh te njerezve te ketij vendi per ta bere kete vend te denje per femijet tane dhe po ashtu, eshte arma e çdo shqiptari qe e do Shqiperine me shtet, pune, mireqenie, kunder çdo zyrtari e nepunesi qe e pengon njeriun e zakonshem ne zgjidhjen e halleve e ne permbushjen shpresave e te endrrave te veta. Behuni pjese e kesaj platforme ku s’ka bindje e perkatesi te ndryshme qe na ndan per te bere SHQIPERINE QE DUAM”
