Akademia serbe këtë herë është treguar dy hapa para politikanëve të vendit, duke u shprehur realisht për Kosovën. Radhës së politikanëve serbë të cilët kanë “përjetuar” shok pas deklaratës së Kostiç në lidhje me Kosovën, i është bashkuar edhe presidenti serb, Tomislav Nikoliç.
Ai ka thënë se është i habitur me deklaratën e Presidentit të Akademisë së Arteve dhe Shkencave të Serbisë, në lidhje me “humbjen e Kosovës”.
“Serbia nuk ka bërë ende ndonjë hap që do të mund t’i kontribuonte idesë se pavarësia e vetë-shpallur është realitet”, thuhet në deklaratën e Nikoliçit.
Ai, e ka “qortuar” Kostiçin duke i thënë se “nuk mund të flasë për Kosovën në mënyrë individuale” pasi “Kosova nuk është pronë e tij”.
“Si mundet që ai ose dikush tjetër të japë diçka që nuk është e tij. Kosova nuk është e jotja e as e ndonjë individi tjetër. Kosova i takon paraardhësve dhe pasardhësve tonë”, thuhet veç tjerash në reagimin e Nikoliç.
Pak ditë më parë Presidenti i Akademisë së Shkencave dhe Arteve të Serbisë, Vladimir Kostic në një deklaratë të tij për media ka thënë se Kosova nuk është më në duart e tyre.
“De facto dhe de jure, Kosova nuk është në duar tona”, ka thënë Kostic, duke shtuar se Akademia nuk e ka artikuluar ende qëndrimin e saj për Kosovën dhe Metohinë.
