Kampioni i Botës Nico Rosberg njoftoi se është tërhequr nga Formula 1, pasi e përmbushi ëndrrën e tij. Vendimi i Rosberg për t’u tërhequr u njoftua në Facebook, në më pak se një javë pasi ai fitoi titullin e tij të parë.
“Gjatë viteve të fundit të garave kam pasur vetëm një ëndërr, një ‘gjë’ të vetme, ajo që të isha kampion i Formula 1. Përmes një pune të vështirë, dhimbje, lodhje, kam pasur vetëm atë qëllim në kokë. Dhe tani unë atë e kam prekur. Unë u ngjita në majën kryesore, tani jam në kulmin e tij dhe emocioni im i fortë aktualisht është mirënjohja e thellë për të gjithë ata që më kanë mbështetur për të përmbushur ëndrrën time “, ka shkruar Rosberg 31-vjeçar.
Rosberg, të dielën, fitoi titullin botëror në Abu Dhabi edhe pse përfundoi i dyti. Piloti gjerman fitoi nëntë gara nga 21, sa ekzistojnë në kampionatin e Formula 1.
“Kur kam fituar në Suzuka, nga momenti kur fati i titullit ishte në duart e mia, filloi të më rritet dhe presioni dhe mu atëherë unë mendova për ta përfunduar karrierën time, nëse do të bëhesha kampion. Të dielën në Abu Dhabi e dija se kjo do mund të ishte gara ime e fundit dhe meditimi më bëri të ndihesha gati për të pastruar dyshimin në kokën time. Atë e bëra të hënën në mbrëmje. Pas një ditë, ia njoftova vendimin (gruas) Vivian dhe George-s (Nolte, nga ekipi i menaxhimit të Rozberg). E vetmja gjë që e bën të vështirë vendimin është mungesa që do kem nga Formula 1, por ata e kuptojnë”, tha Rosberg, përgatiti BETA.
Ai shkroi se tani do të gëzojë këtë moment, dhe shpejt do të vendosë se me çfarë do të merret.
I biri i kampionit të botës të vitit 1982 Keke Rosberg, Nico e bëri debutimin e tij në F1 për Williams në Grand Prix e Bahrein në vitin 2006, duke përfunduar në vendin e shtatë. (b.an)
