Policia turke ëshët çdo ditë e më pranë kapjes së supermashtruesit Faruk Fatih Özer. Media “A haber” ka bërë me dije se rrethi për kapjen e tij po ngushtohet dita-ditës duke marrë në intervistë edhe ministrin e Brendshëm.
Süleyman Soylu u shpreh se ka pasur zhvillime të rëndësishme dhe se vendndodhja e themeluesit të “Thodex” nuk ishte më sekret për Turqinë.
“E dimë që është në Shqipëri. Megjithatë po mbajmë në kontakt edhe vendet e tjera. E e dimë se ku është dhe do shkojmë aty. Është çështje kohe,”-tha ai.
27-vjeçari Ozer është person i shpallur në kërkim ndërkombëtar nga autoritetet policore turke dhe nga Sekretariati i Përgjithshëm i Interpolit në Lyon pasi rezulton i dyshuar për mashtrim në shtetin turk nëpërmjet valutës elektronike bitcoin që kap vlerën rreth 2 miliardë dollar.
Faruk Ozer rezulton të jetë futur në Shqipëri nga pika e kalimit kufitar të Rinasit më 20 prill të këtij viti, ndërkohë që kanë dalë dhe pamje filmike nga momenti kur ai është akomoduar në një prej hoteleve të kryeqytetit, nga një shtetas shqiptar, i cili ka deklaruar se nuk ishte në dijeni të veprës penale që kishte kryer biznesmeni turk.
