Këshilli i Lartë i Prokurorisë nisi sot intervistat me kandidatët për Strukturën e Posaçme kundër Korrupsionit dhe Krimit të Organizuar. I pari që dha intervistën ishte Altin Dumani, drejtues i komanduar i Apelit për Krime të Rënda. Pas tij, ishin Anita Jella prokurore e Durrësit, Anton Martini prokuror tek Krimet e Rënda dhe prokurori Arben Kraja.
Janë 23 kandidatë në total kandidatë për SPAK që do ti nënshtrohen intervistimit. Procesi do të zgjasë deri me 12 korrik.
Pas seancave dëgjimore, kreu i KLP shpjegoi se pse nuk ishin të hapura për median siç ishte njoftuar më herët.
“Ka pas një keqkuptim lidhur me deklaratën e parë. Intervistat janë regjistruar me audio dhe video, por jo që të bëhen publike. KLP është i prirur të jetë i hapur”, deklaroi Ibrahimi.
Kreu i KLP është pyetur nëse ndonjëri nga kandidatët rrezikon të bëhet pjesë e SPAK, pasi mund të ngecë në Vetting. Ibrahimi nuk e përjashtoi rrezikun, duke thënë se KLP merret me profesionalizmin, ndërsa Vettingu me integritetit. Më tej, ai shtoi se i gjithë procesi është ndjekur edhe nga ndërkombëtarët.
“Rreziku ekziston, aftësia profesionale dhe integriteti shkojnë pranë-pranë. Ky proces synon profesionalizmin, ndërsa Vettingu integritetin. Kam besimin që të dy proceset do shpien drejt rezultateve të njëjta.
Ndërkombëtarët janë pjesë e çdo etape të këtij procesi, kanë folur një për një, kanë punuar krah për krah. Ata nuk mund të japin pikë në fund, por ne nuk mund të fluturojmë përtej gjetjeve të procesit.
Ne duam të marrim më të mirën e kandidatëve, meraku ynë ishte që po të bëhej publik procesi i intervistimit, kandidatët nuk do të ishin të lirë. Morëm një mendim për vështirësitë që kanë hasur ndaj proceseve gjyqësore.
Ata dhanë arsyet dhe motivet për të konkurruar, si psh., që vlerësimi këtë radhë do të jetë maksimal. Edhe procesi i përzgjedhjes, kujtojmë si përzgjidheshin prokurorët e Krimeve të Rënda dikur, është si nata me ditën me tani. Besimi i tyre te procesi ishte një arsye kryesore për të konkurruar”, u shpreh kreu i KLP.
Pas intervistimit do të bëhet pikëzimi i 23 kandidatëve të mbetur në garë.
Kreu i KLP-së ka deklaruar se SPAK mund të krijohet edhe me një numër minimal anëtarësh, edhe më pak se 10, në varësi të vendimit që do të marrë KLP.
Ndërkohë, përsa i përket procesit të vettingut, deri më tani e kanë kaluar vetëm 10 nga 23 kandidatët e mbetur, ndërsa pritet që t’a kalojnë edhe prokurorët e mbetur.
Ibrahimi ka deklaruar se procesi në përgjegjësi të KLP-së pritet të përfundojë përgjatë muajit korrik.
g.kososvari
