Një 50-vjeçar shqiptar, së bashku me bashkëshorten dhe dy mbesat e tyre janë arrestuar në Greqi nga policia greke në bashkëpunim me DEA Amerikane, pasi janë kapur me 585 kg kokainë, të ndarë në 500 pako.
Sipas raportimeve nga mediat greke, mësohet se 50-vjeçari së bashku me të shoqen 42 vjeçe dhe dy mbesat e tij, 33 dhe 21 vjeçe si dhe një 35-vjeçar grek, ishin posedues të lëndës së madhe narkotike, e cila u sekuestrua në dy automjete dhe në një banesë.
Policia greke ka tentuar të ndalojë dy automjete në zonën e Agia Triada dhe Neo Epivaton. Një nga automjetet ka ndaluar, ndërsa tjetri ka tentuar të largohet duke u përplasur me një makinë policie dhe më pas me gardhin e një ndërtese, pa pasur dëme në njerëz. Të dyja mjetet rezultojnë të marra me qira.
50-vjeçari sipas Protothema, trafikonte kokainë nga Amerika Latine për shpërndarje në Greqi dhe Europë.
Në kontrollin e kryer në dy makinat, por edhe në një shtëpi ku banonin tre nga të arrestuarit, janë gjetur dhe konfiskuar:
585 kg kokainë, të paketuara në 500 pako;
7440 euro;
7 telefona të përdorur për të komunikuar me njëri-tjetrin;
detektor metali dhe sende të tjera.
Gjithashtu u sekuestrua një makinë pasagjerësh në pronësi të drejtuesit të organizatës./m.j
