Organizata joqeveritare Iniciativa për Progres- INPO prej disa vjetësh e monitoron punën e Kuvendit Komunal të Ferizajt.Në një intervistë për “Kohën Ditore”, drejtoresha ekzekutive Albulena Nrecaj ka thënë se Ferizaj është shndërruar në peng të subjekteve politike pozitë e opozitë, të cilat nuk po e përfaqësojnë interesin qytetar.
Sipas saj, biznesi e ndërtimet e larta janë fokusi kryesor i subjekteve politike. Ajo ka bindjen se në Ferizaj nuk ka pasur ndryshim të modelit qeverisës në zgjedhjet e vitit 2013. Sipas saj, pushteti aktual nuk ka strategji apo vizion të qartë për menaxhimin e qytetit. Kurse subjektet opozitare, Nrecaj mendon se janë dorëzuar para abuzuesve të ligjit, shkruan “Koha Ditore”.
Kjo organizatë ka reaguar kundër shkeljeve ligjore në planet urbane për zonën I dhe VIII, për të cilën gjë Prokurorisë Themelore i ka bërë shkresë për t`u hetuar drejtori për Urbanizëm, siç ka reaguar edhe ndaj zhvillimeve të fundit me shkeljet ligjore procedurale gjatë miratimit të propozimit për debat publik për Planin Zhvillimor Komunal. (b.an)
