Ministri i Brendshëm Saimir Tahiri ka dhënë një deklaratë të shkurtër për mediat pas raportimit të bërë në Komisionin Kuvendor të Sigurisë për Çështjen e Emigrantëve. Ai tha se Policia e Shtetit është vendosur në gjendje gadishmërie dhe janë marrë masa shtesë. Po ashtu tahiri gjeti rastin të mbronte ligjin për sigurinë publike, që parashikon vendosjen e kamerave në biznese dhe ambjente të ndryshme. Ai kërkoi dekretimin sa më parë të ligjit.
“Masa shtesë që në mjedise rekreative të ketë masa shtesë të sigurisë. Kopshte, shkolla dhe lokale nate ku ka frekuentim të madh të ketë masa shtesë të sigurisë. Kamerat e sigurisë, këto janë një sërë masash që kemi propozuar në ligj, opozita u shpreh kundër, iu bë thirrje presidentit të mos e dekretojë.
Unë dua të bëj thirrje që për të qenë të sigurtë duhet të lëshojmë pak nga liria jonë dhe privatësia jonë. Gjithsecili të jetë kontributor. Unë preferoj që të kem një shkollë fëmijësh të pajisur me kamera sesa të dëgjoj ata që shprehen se nuk i duan kamerat se u filmohen kalamajtë, më mirë të jenë të filmuar e të sigurt sesa të pafilmuar e të pasigurt.
Është shumë e rëndësishme dhe për nivelin e sigurisë për vendin. Nuk e rrisim dot nëse nuk marrim masa radikale”.
