Në rast se Gjykata Kushtetuese do të vendosë që t’i heqë mandatin deputetit Armando Prenga, atëherë në Kuvend do të zgjidhet si përfaqësuese e PS-së për qarkun Lezhës, Mirela Neli(Syku) e datëlindjes 76.
Ndonëse e renditur në fund të listës së kandidatëve, për shkak të detyrimit ligjor që të paktën 30 për qind e listës duhet t’i përkasë gjinisë më pak të përfaqësues (femra), Mirela Neli do të fitojë mandatin. Në rast se ajo do të japë dorëheqjen, atëherë mandati do t’i shkojë Eduard Ndocajt.
Ndocaj ka qenë ish-kandidat i PS-së në listat për deputet në Qarkun e Lezhës, madje kërkoi që të kandidonte edhe për zgjedhjet vendore.
Pas refuzimit nga PS-së që të ishte ai kandidat, Eduart Ndocaj, shprehu zhgënjimin e tij ndaj kësaj partie, duke i kujtuar dhe kontributin financiar që ka dhënë për të, që sipas tij, arrin në vlerën e 60 milionë lekëve.
Pak kohë më parë Ndocaj i kujtoi publikisht kreut të maxhorancës faturat që ka paguar në drekat në Itali.
Ish- kandidati i Partisë Socialiste tha se i ka paguar Edi Ramës një drekë 8 mijë euro në një restorant në Milano.
Ndocaj, pronar i një biznesi në Itali, tha në atë kohë se Rama është “bukëshkalë dhe një njeri i lig”.Nuk dihet si do vejë fati i mandatit të Prengës por është e sigurt që Ndocaj është një person i padëshiruar nga PS. /Dita/
