Imzot Xhorxh Frendo është ndjerë i shokuar dhe i keqardhur kur mësoi se 2 gra humbën jetën nën tortura duke besuar tek vetëflijimi dhe ringjallja.
Kreu i Kishës Katolike në Shqipëri e quan këtë një keqkuptim të besimit duke përdorur Librin e Shenjtë të Biblës.
“Në lidhje me lajmin për të cilin është folur shumë në këto ditë, domethënë për ato dy gra që u gjetën të vdekur në shtëpinë e tyre (madje njëra prej tyre kishte qenë vdekur për më shumë se një vit) e ndiejmë nevojë të bëjmë disa sqarime.
Besimet zyrtarisht e njohura në Shqipëri, domethënë ai Mysliman dhe ai i Krishterë, besojnë në jetën pas vdekjes dhe në ngjalljen. Por besimi ynë në ngjalljen na ngarkon me më shumë përgjegjësi rreth respektin për jetën dhe mënyrë si të jetojmë derisa jemi ende në botë.
Ne besojmë se jeta është dhuratë nga Zoti, dhe, si çdo dhuratë nga Zoti, duhet të përdoret me përgjegjësi, sepse Zoti shpërblen njeriun varësisht nga si e ka përdorur këtë dhuratë, që është jeta.
Kjo do të thotë gjithashtu se asnjëri nuk ka të drejtë të vrasë një person tjetër, madje as të vetëvrasë. Vetëvrasja është mëkat.
Kam lexuar shumë, këto ditët, në gazetat, fjalën “vetëflijim”. Ky është një eufemizëm krejt i gabuar. Kujt bëhet “flijim” në vetëvrasje? Sigurisht jo Zotit, i Cili i ka komunikuar jetën atij personi si dhuratë, dhe ky e ka hedhur poshtë.
Kujt bëhet “flijim” pra? Familjarëve? Kam pasur raste të njohë familje brenda të cilave kanë pasur një vetëvrasje.
Për sa shumë kohë kanë mbetur të tronditur, të frikësuar, të rraskapitur. Pra le të jemi të sinqertë e të flasim troç. Është absurd të quajmë vetëvrasjen “vetëflijim”.
Së fundmi dëshiroj të them se është bërë një padrejtësi me Kishën Ungjillore kur disa gazetarë kanë identifikuar sektin e Dëshmitarëve të Jehovait (e themeluar në vitin 1870 nga Charles Russell) me Kishën Ungjillore. Edhe pse këta përdorin Biblën, por e interpretojnë në mënyrë shumë të çuditshme, krejt e ndryshme nga mënyra si e kuptojnë Kishat.
Dhe edhe pse përmendin Jezusin, por e interpretojnë Jezusin krejt në kundërshtim me mënyrën sesi Kisha e ka kuptuar dhe shpallur që nga koha e apostujve deri më sot”, shprehet Imzot Frendo.
Imzot Frendo kërkon nga njerëzit që të mos bien pre e sekteve që përdorin ndjeshmërinë apo gjendjen e tyre psikologjike për t’i zhytur ata në labirinthe gënjeshtrash.
“Dëshiroj të kenë kujdes, të mos lënë asnjë njeri që t’ju ushtrojnë lavazh truri se disa sekte vërtetë ushtrojnë një lavazh truri. Shpeshherë kur ka ndodhur një tragjedi, përfitojnë për të shkuar për t’i ngushëlluar duke treguar doktrinën e tyre. Kjo nuk është e mirë, kjo është një abuzim”.
/e.rr
