Parlamenti u mblodh sot në seancë plenare për të diskutuar projekt-rezolutën e propozuar nga PD kundër dhunës ndaj grave. Por, edhe këtë herë, çështjet e tjera politike zunë një pjesë të mirë të debateve.
Teksa kryeministri Rama dhe lideri i PD Basha ndodhen në Bruksel, debatin në parlament i mbajti gjallë ish-kryeministri Berisha dhe kreu i grupit të PS Balla.
Berisha ka akuzuar Ramën se nuk shpall gjëndjen e jashtëzakonshme pas përmbytjeve, pasi nuk do të dëmshpërblejë banorët e prekur nga përmbytjet.
“Po pse more, pare tepër kisha unë për të dëmshpërblyer? Për të shpallur gjendje të jashtëzakonshme? Po ka një moral, i ka përmbytur Vjosa, kanë 20-30 vite qe jetojne aty e s’mund ti them pse ke ndërtuar aty dhe për ti dëmshpërblyer duhet shpallur gjendja e emergjencës civile. Dhe vetëm me këtë qeveria i dëmshpërblen, përndryshe qeveria vetem vjedh ndihmat e tyre”, tha Berisha.
Më tej ai akuzoi qeverinë për koncensionin e ndërtimit të inceneratorëve akuzë e lakuar prej ditësh edhe nga kreu i PD Basha. Berisha ka përmendur këtu emrin e biznesmenit Klodian Zoto, i cili sipas tij, ka qenë dikur ish-menaxher i Ahmetajt në kompaninë Hermes.
“Kjo qeveri, me në krye Ramën e Ahmetajn dhe ministrin Koka, brenda një 1 dite, në kundërshtim me ligjin ndërkombëtar, bëjnë nën veprime dhe ia japim tenderin atij që deshën”, tha Berisha, duke akuzuar Ramën e Ahmetajn se të dy kanë marrë para nën dorë nga biznesmeni Klodian Zoto.
Ndërsa Taulant Balla u përgjigj duke i kujtuar Lulzim Bashën dhe aferën e Rrugës së Kombit.
“Nuk besoj se kishit ndonjë surprizë nga parafolësi. Edhe per nga mënyra si foli është apologjia më e mirë që mund ti bëhet sjelljes së patolerueshme të ndonjë politikani, edhe kur bëhet fjalë për një ditë kaq solemne qe Kuvendi ndermerr për luftën ndaj dhunës ndaj grave. Për parafolësin s’ka asnjë lloj gjëje tjetër rëndësi përvec luftës për karrige e sa i përket gënjeshtrës, ky eshte kampioni me i madh ne histori. Ngatërrove 220 mln e Lulit te ‘Rruga e Kombit’, Sali, mos ia bëj Lulit pas krahëve se ka ikur në Bruksel. Une e kuptoj që nuk e do më Lulin, inatin dhe dashurinë mbaje brenda vetes. Luli s’e shpjegoi mirë javën e kaluar, erdhe ti, edhe ti e bëre lëmsh”, tha Balla./a.m.
