Nëna e 5-vjeçares që denoncoi fqinjën se ka kryer vepra të turpshme me vajzën e saj është thirrur dje paradite në Prokurorinë e Rrethit Gjyqësor Dibër. Gëzime Lleshi, 33-vjeçarja nga Bulqiza, së bashku me vajzën e mitur janë marrë në pyetje për disa orë nga prokurorë të këtij rrethi.
Mësohet se personazhi më mediatik i javës së fundit në qarkun e Dibrës ka pohuar se kallëzimi i saj ndaj Petrit Çupit është kryer në shenjë hakmarrjeje ndaj burrit të parë të saj, i cili është njeri i afërt i gruas së Çupit.
Drejtues të Prokurorisë Dibër nuk japin të dhëna në lidhje me deklarimet e Gëzime Lleshit, por pranojnë se ajo është marrë në pyetje bashkë me psikologen dhe punonjësen që merret me mbrojtjen e fëmijëve në Bashkinë e Bulqizës.
Ndërkohë, familjarët e Petrit Çupit thonë për “Panorama” se kanë grumbulluar prova e fakte se ngjarja është e sajuar dhe kërkojnë lirimin e tij. Mësohet se bashkëshortja e minatorit ka marrë firmat e banorëve të gjithë pallatit ku banon.
Ato deklarojnë se nuk kanë parë e dëgjuar se Petriti të ketë ngacmuar vajzën autike 5- vjeçare të Gëzime Lleshit. Në lidhje me zhveshjen e rrobave nga minatori në bodrumin e pallatit, fqinjët kanë saktësuar se ai aty mbante rrobat që vishte në minierë.
“Petriti është parë në bodrum duke hequr rrobat që mbante gjatë ditës dhe vishte rrobat me baltë e zhul që vesh nëntokë. Ndoshta dy fëmijë të vegjël e kanë parë këtë moment, por kurrsesi ai nuk i ka prekur ato. Ai është një familjar i mirë dhe gjithçka duhet të jetë sajesë”, deklarojnë banorët e pallatit ku qëndrojnë Gëzime Lleshi e Petrit Çupi.
Sot gjykata caktoi mase sigurie detyrim paraqitje ndaj tij dhe e la të lirë.
