“Xhevahiri rrezatues është bërë kufoma e vetvetes”. Kështu ka deklaruar kryeministri Edi Rama në një takim grupin reformator të Akademisë së Shkencave.
Kryeministri është treguar i ashpër me akademikët, ku shpjegoi arsyet që u ndërpreu financimet, ndërsa po dëgjon edhe pretendimet e anëtarëve.
Rama deklaroi se Akademia nuk reflekton vizionin e etërve themelues.
“Humbën më shumë se një vit në një inerci të kalbëzimit të vazhdueshëm të një institucioni, që dikur u krijua si xhevahiri rrezatues dhe sot është burim pezmatizimi, për të mos thënë brengë për ata që e themeluan.
Kjo situatë na ka shtyrë që të çojmë përpara idenë e refuzimit për ta financuar më tutje këtë institucion me paratë e taksapaguesve.
Akademia e Shkencave është kufoma e vetvetes, nuk reflekton vizionin e etërve themelues. Kam përballë studiuesin Luan Omari, akademia nuk ka arritur të reflektojë transformimin epokal të dijes shqiptare.
Kam pasur një kërkesë për t’iu dëgjuar, me gatishmërinë për t’u dëgjuar, një përpjekje ‘in-extremis’ por unë me ministren jemi këtu për t’iu dëgjuar” deklaroi ai.
Lidhur me debatin e shumëpërfolur mbi fondet që qeveria do t’i japë Akademisë, Rama tha se do të ketë shkurtim drastik të parave dhe do të jepen vetëm aq sa mjaftojnë për honoraret.
“Do bëjmë shkurtim drastik të fondeve, por do të ruajmë fondet për ata që marrin honorare apo shpërblim, me një kusht: Të përkthehet brenda marsit në një platformë rithemelimi të Akademisë së Shkencave. Sigurisht edhe kjo punë do bëhet në bashkëpunim. Po nuk preka, nuk besoj dot se kjo do bëhet. Ju takon ju, ne jemi të gatshëm për gjithçka por në buxhetin e 2018 do të lejojmë vetëm pjesën që do t’ju mbajë bashkë ju në funksion të kësaj pune. Por Akademia si shërbim social do të mbyllet. Kështu është katandisur, shërbim social”, tha Rama.
Akademiku Artan Fuga tha se reformimi i Akademisë së Shkencave duhet të bëhet përmes rithemelimit. Ai tha se duhet reformim dhe më pas zgjedhje.Fuga parashtroi edhe disa pika të cilat duhet të përfshihen për reformimin.
/a.ç
