Prokuroria e Tiranës vijon hetimet për vrasjen e biznesmenit Ruzhdi Hoxha. Report Tv mëson se ditën që do kryente vrasjen, autori i dyshuar Fredi Rrushi e ka telefonuar tre herë Hoxhën, ndërsa ky i fundit nuk i është përgjigjur. Autori ka kontaktuar më pas me biznesmenin përmes një personi tjetër që ndodhej në një tavolinë me këtë të fundit, duke e çuar më pas drejt Dajtit, ku edhe e ekzekutoi.
Dinamika e ngjarjes
Rreth orës 15:00, Fredi Rrushi raportohet se ka shkuar drejt Dajtit me biznesmenin Hoxha. Burime për Report Tv bëjnë me dije se Rrushi ka ekzekutuar Hoxhën, dhe më pas është nisur sërish drejt Tiranës. Prokuroria ka dokumentuar itinerarin e viktimës dhe autorit nga qelizat telefonike.
Një ditë pas vrasjes, Fredi Rrushi ka shkuar sërish drejt Dajtit, rreth orës 5 të mëngjesit. Në këtë orë, dyshohet se ai ka fshehur trupin e viktimës, duke e mbuluar me dhe e gurë. Ndaj Fredi Rrushit mësohet se rëndojnë tre akuza, “vrasje me paramendim”, “armembajtje pa leje” dhe “zhdukje kufome”
Celulari i viktimës, në duart e një taksisti
Autori mësohet se pas vrasjes, ka marrë edhe celularin e viktimës, të cilin e ka hedhur në rrugicat e Tiranës. Sakaq, aparati celular i biznesmenit Hoxha është gjetur nga një taksist. Ky i fundit, pasi e ka gjetur e ka shitur celularin.
Sipas policisë Fredi Rrushi, është autor i rrëmbimit dhe i vrasjes së Ruzhdi Hoxhës. Fredi Rrushi është arrestuar më datë 26 tetor 2021 nga DVP Tiranë, si person i shpallur në kërkim ndërkombëtar nga autoritetet ligjzbatuese italiane për veprën penale të trafikimit të narkotikëve.
Si u gjet trupi i pajetë i biznesmenit
Si rezultat edhe i kontrollit me qentë e gjurmës, në Qafë Mollë, mbrapa Dajtit, në një greminë, u gjet i mbuluar me zhavorr e gurë trupi i pajetë i shtetasit Ruzhdi Hoxha. Gjithashtu, ky person dyshohet dhe si porositësi dhe organizatori i kultivimit të bimëve narkotike në fshatin Ballenj, me datë 31.10.2021, ku u vunë në pranga shtetasit A. D dhe G. K. Fredi Rrushi akuzohet për veprat penale “Vrasje me paramendim” “Kultivim i bimëve narkotike” dhe “Fshehja e kufomës”. Nga ekspertiza paraprake rezulton se shtetasi Ruzhdi Hoxha është vrarë me armë zjarri./ shqiptarja.com
g.kosovari
