Shqipëria dhe Kina bashkohen në Pekin përmes kulturës dhe mbrojtjes së natyrës. Ditën e mërkurë, Ambasada e Shqipërisë në Pekin u shndërrua në një hapësirë takimi mes kulturës, natyrës dhe diplomacisë, duke mirëpritur aktivitetin “Albanian Cultural Heritage & Bird Photography Exchange Event”. Eventi promovoi trashëgiminë kulturore shqiptare dhe rëndësinë e mbrojtjes së biodiversitetit përmes artit të fotografisë së shpendëve.
Aktiviteti u hap me një performancë të veçantë të artit tradicional kinez “Bian Lian”, i njohur për teknikën spektakolare të ndërrimit të maskave, ndërsa më pas u inaugurua Ekspozita e Trashëgimisë Kulturore Shqiptare dhe edicioni i tetë i Festivalit të Dashamirësve të Shpendëve.
Në fjalën e tij përshëndetëse, Ambasadori i Shqipërisë në Kinë, z.Riza Poda, theksoi rëndësinë e dialogut kulturor dhe të shkëmbimeve mes popujve, si një forcë që afron vendet dhe forcon miqësinë shqiptaro-kineze. Ai vlerësoi nisma të tilla si një mundësi për të promovuar vlerat kulturore të Shqipërisë dhe për të ndërtuar ura të reja bashkëpunimi.
Programi vijoi me pjesëmarrjen e fotografit dhe studiuesit të njohur të shpendëve, Ai Yakang, si dhe me shfaqjen e materialeve kushtuar natyrës shqiptare dhe mesazheve për mbrojtjen e mjedisit.
Aktiviteti u përmbyll me vizitën në ekspozitat fotografike dhe kulturore, duke përcjellë një mesazh të qartë: kultura dhe natyra janë vlera universale që bashkojnë njerëzit përtej kufijve.
