Inspektorati Kombëtar i Mbrojtjes së Territorit (IKMT) vijon me kontrollet në kantiere ndërtimi në disa qytete të vendit. Sipas njoftimit më të fundit zyrtar, mësohet se janë ndëshkuar me gjoba dhe vendime për pezullim punimesh plot 65 subjekte. Kjo, si rezultat i shkeljeve të konstatuara gjatë inspektimeve.
Në Tiranë janë verifikuar gjithsej 219 objekte ndërtimi, nga të cilat 41 janë me leje nga Këshilli Kombëtar i Territorit dhe 178 me leje nga njësitë vendore. Pas rikontrollit, në 45 kantiere janë konstatuar mungesa të masave të sigurisë, duke sjellë masa administrative dhe pezullim punimesh.
Në zonën e Golemit, janë inspektuar 73 subjekte ndërtimi. Pas verifikimeve, 8 prej tyre janë ndëshkuar me gjobë dhe pezullim punimesh për shkelje të konstatuara.
Kontrollet janë shtrirë edhe në jug të vendit. Në Vlorë janë inspektuar 32 objekte, ku në 12 raste janë vendosur masa ndëshkuese. Ndërkohë, në Himarë janë identifikuar 71 subjekte me leje të miratuara, nga të cilat deri tani janë inspektuar 14.
IKMT bën të ditur se procesi i verifikimeve do të vijojë edhe në Durrës, në bashkëpunim me institucionet përkatëse si AZHT dhe IMT-të vendore.
Duke marrë parasysh numrin e lartë të vdekjeve në kantieret e ndërtimit, sidomos vitet e fundit, është përgatitur një plan pune i detajuar për të garantuar sigurinë në punë. “Ata që nuk kanë plotësuar kërkesat për sigurinë teknike, do të ndëshkohen rreptësisht”, kështu ka paralajmëruar më herët kryeinspektor i IKMT-së, Afrim Qëndro.
Aksioni për të kontrolluar çdo kantier në kuadër të sigurisë teknike po kryhet prej muajsh nga IKMT (Inspektoriati Kombëtar i Mbrojtje së Territorit), AZHT (Agjencia e Zhvillimit të Territorit), inspektoriati i Tiranës dhe policia bashkiake.
