Liderët botërorë përgëzuan Donald Trump për rikthimin e tij në majën e pushtetit si president. Shumë prej tyre kërkuan aleanca më të fuqishme apo vazhdimin e bashkëpunimit mes vendeve dhe Shtetet e Bashkuara përmes postimeve të mirëmenduara në rrjete sociale apo deklaratave.
Kryeministri indian, Narendra Modi, e quajti presidentin amerikan “mik i dashur”, ndërsa lideri i Hungarisë, Victor Orban, tha se kishte “ardhur koha e tyre për të shkëlqyer”. Por jo të gjitha mesazhet ishin përgëzuese. Duke iu përgjigjur kërcënimeve të tij, presidenti i Panamasë, Jose Raul Mulino, refuzoi dorëzimin e Kanalit të Panamasë në kontrollin e Shteteve të Bashkuara. Fqinjët e tjerë rajonal e kritikuan Trumpin gjithashtu.
Kuba dënoi vendimin e tij për rivendosjen e ishullit në listën Amerikane të shteteve që sponsorizojnë terrorizmin. Kryeministri në largim i Kanadasë, Justi Trudeau, përdori një ton më të butë pavarësisht sinjaleve për vendosjen e tarifave tregtare, shkruan A2 CNN.
Liderët e vendeve të përfshira në luftë patën mesazhe të ngrohta në drejtim të Trumpit, me kryeministrin izraelit që theksoi se ditët më të mira të aleancës janë përpara. Presidenti rus, Vladimir Putin, u shpreh i hapur për rindërtimin e marrëdhënieve me SHBA-të, ndërsa lideri ukrainas, Volodymyr Zelenski nënvizoi se Trumpi si president sjell ndryshim dhe shpresë për paqe përmes politikës së forcës. Sekretari i Përgjithshëm i NATO-s, Mark Rutte, vuri theksin tek shtimi i shpenzimeve për mbrojtjen dhe rritjen e prodhimit të armëve. Në Europë, urimet kanë qenë jo dhe aq entuziaste me kancelarin gjerman, Olaf Scholz, kryeministrin britanik, Keir Starmer dhe liderët e Bashkimit Europian që kërkojnë të punojnë me Trump për të fuqizuar partneritetin transatlantik. Mesazhe urimi kanë vërshuar edhe nga Ballkani Perëndimor. Presidenti shqiptar, Bajram Begaj, theksoi rëndësinë e aleancës dhe miqësisë së fortë me SHBA-në.
Presidentja e Kosovës, Vjosa Osmani, rikujton angazhimin thelbësor Amerikan në ditët më të errëta të vendit dhe kujton se shqiptarët janë populli më pro-amerikan në botë. Lideri serb, Aleksandër Vuçiç, uroi Trumpin duke theksuar se beson në vizionin e presidentit për një botë me paqe, liri dhe drejtësi.
