45 persona nga qytete të ndryshme janë shoqëruar për t’u marrë në pyetje pas vrasjes së dyfishtë mbrëmjen e djeshme në lagjen 14 Shkozet në qytetin bregdetar. Megjithatë deri tani nuk ka asnjë të ndaluar. Sipas Report Tv, Anxhelo Avdia dhe Dorian Shkoza u ekzekutuan në mënyrë mafioze të mirë organizuar nga vrasës profesionistë me pagesë.
Avdia dhe Shkoza ishin duke ecur në këmbë kur u qëlluan me pistoletë për vdekje nga një makinë tip ‘Benz’. Vetëm pak minuta pas vrasjes së dy të rinjve, në hyrje të Rrogozhinës, në vendin e njohur si “Bishti i Zhurit” policia gjeti një mjet tip ‘Benz’ duke u djegur, targat e të cilave kanë qenë të vjedhura nga një tjetër mjet. Mësohet se mjeti tip “Benz” me targë AA 693 ZE rezulton se i është vjedhur me iniciale R.L, banor i fshatit Sineballaj të Rrogozhinës, i cili kishte bërë edhe denoncim në polici.
Hetuesit po shqyrtojnë aktivitetin e shkuar të viktimave për të përcaktuar edhe pistat e hetimit. Situata ende është e paqartë për grupin hetimor, ndërsa pista e parë ku po hetohet lidhet me prishjen e pazareve të drogës ose konflikte të tjera. Njëri nga viktimat, Dorian Shkoza 35 vjeç ka qenë i dënuar 8 vite për drogë dhe ka dalë nga burgu në fund të 2010-ës.
