Tre shqiptarë, mes tyre edhe një vajzë, janë vënë në prangat e policisë italiane.
Ata akuzohen për grabitje të shumta, të kryera kryesisht në netët e ndërrimit të viteve në Itali, kur shumë njerëz ishin larguar për të festuar diku tjetër.
Për sa i përket vajzës së arrestuar, ajo rezulton të jetë e përfshirë në ngjarje kriminale edhe herë të tjera.
Sipas mediave italiane, vjedhjet që kishin arritur të kryenin shqiptarët kapin një shumë prej 100 mijë eurosh.
Grabitjet më të shumta janë kryer gjatë festave të fundvitit. Arrestimi i shqiptarëve është finalizuar mbrëmjen e djeshme. Mediat italiane e bënë atë publike sot, pasi policia dyshon se rrjeti është edhe më i gjerë.
Arrestimi i shqiptarëve ka ardhur falë bashkëpunimit që policia bëri me banorët e zonës midis provincave të Pizës dhe Luccës në periudhën nga 31 dhjetori deri në 3 janar.
Pas kontrolleve në banesën ku jetonin tre shqiptarët e arrestuar, policia gjeti ora të markave të shtrenjta si Rolex, Sector, Casio, Cartier, si dhe sende të tjera të çmuara si vathë, unaza, gjerdanë, byzylykë ari dhe gurë të çmuar, përfshirë diamante, smerald dhe rubin të cilat kapnin vlera të mëdha.
Mes objekteve të vjedhura u gjetën edhe disa çanta dhe sende të tjera të firmave luksoze, si Gucci, Prada, Fendi etj..
Përveç bizhuterive dhe sendeve të tjera me vlerë, shqiptarëve u është gjetur edhe një sasi prej 1 kg kokainë.
Sipas mediave tre të arrestuarit kanë kryer të paktën 6 vjedhje, ndërsa tre grabitje i kanë bërë në 3 apartamente në qendër të qytetit në zonën Porta a Mare, një brenda një vile në Pontasserchio, një tjetër brenda një vile tjetër në San Giuliano dhe një e fundit, brenda një shtëpie në Capannori, në Lucca.
/a.r
