Jo vetëm Bitcoin dhe kriptovaluta. Presidenti amerikan, Donald Trump, po investon fuqishëm edhe në obligacione të kompanive dhe të shteteve, aq sa ka investuar tashmë mbi 100 milionë dollarë. Kjo del nga dokumente qeveritare të sapopublikuara.
Dokumentet tregojnë se që nga marrja e detyrës në Shtëpinë e Bardhë, në janar, Trump ka blerë obligacione të kompanive, shteteve federale dhe komunave me vlerë mbi 100 milionë dollarë. Të paktën sipas dokumenteve të Autoritetit Amerikan për Etikën Qeveritare, të publikuara online të martën.
Sipas këtyre dokumenteve, që nga 21 janari, dita pas betimit të tij të dytë në Shtëpinë e Bardhë, presidenti amerikan ka kryer mbi 600 transaksione financiare. Trump ka blerë, ndër të tjera, obligacione korporatash të bankave amerikane “Citigroup” dhe “Morgan Stanley”, të kompanisë mëmë të “Facebook”-ut, “Meta”, dhe kompanisë nënkontrolluese të firmës gjermane të telekomunikacionit “Telekom”, “T-Mobile USA”. Në listë janë edhe “Wells Fargo”, “Qualcomm”, “Home Depot” dhe “UnitedHealth Care Group”.
Blerjet e tjera kanë përfshirë obligacione të ndryshme të lëshuara nga qytete, shtete, rrethe dhe distrikte shkollore, si dhe emetues të tjerë.
Dokumentet e paraqitura nuk përmbajnë shumat e sakta për çdo transaksion, por vetëm një interval të përafërt. Zyra presidenciale e SHBA-ve nuk ka dhënë asnjë deklaratë në lidhje me këtë.
Obligacionet e blera gjatë muajve që nisën nga janari përfshijnë edhe sektorë që mund të përfitojnë nga derregulimi i nisur nga qeveria Trump. Një shembull është sektori financiar. Ky aspekt ekspozon presidentin ndaj kritikave për konflikte të mundshme interesi.
“Pasuria neto e presidentit Trump është rritur ndjeshëm, duke u përqendruar kryesisht në kriptovaluta dhe ‘Trump Media’. Në këtë dritë, nuk ka dëshmi aktuale që blerjet e tij të obligacioneve të jenë gjë tjetër veçse një diversifikim i kujdesshëm brenda miliarda dollarëve të pasurive të tij,” tha për agjencinë e lajmeve “Reuters” John Canavan, analist amerikan i “Oxford Economics”.
“Duket se ai ka blerë kryesisht obligacione korporatash dhe komunale dhe obligacione të tjera me cilësi të lartë dhe me rankim të lartë, kështu që kjo është vetëm një mënyrë për të ulur pak rrezikun,” shtoi ai.
Në të kaluarën, Trump kishte deklaruar se i kishte kaluar kompanitë e tij në një fondacion të menaxhuar nga fëmijët e tij. Megjithatë, nga deklarata e tij vjetore e pasurisë, e dorëzuar në qershor, rezulton se të ardhurat nga burime të ndryshme përfundojnë në arkat e tij. Kjo ka shkaktuar kritika.
Në deklaratë, që duket se i referohet vitit 2024, Trump ka deklaruar të ardhura mbi 600 milionë dollarë nga kriptovalutat, fushat e golfit dhe licencat. Janë kryesisht kriptovalutat ato që kanë rritur ndjeshëm pasurinë e Trump-it. Sipas një llogaritjeje të bërë atëherë nga agjencia “Reuters”, kjo pasuri arrinte në të paktën 1.6 miliardë dollarë. Sipas “Forbes”-it, Trump ka një pasuri neto prej 5 miliardë dollarësh.
