Kanë kaluar plot 10 vite që kur Artisti i Popullit Kadri Roshi është ndarë nga jeta.
Por në një faqe në Facebook që mban emrin e tij pak ditë më parë janë publikuar fakte dhe pamje të jetës së aktorit të madh shqiptar.
Kjo videoje ndër të rrallat e artistëve me peshë si Roshi, tregon shumë për jetën e tij nga një jetim e deri kur mori dhe titullin e lartë nga presidenti i asaj kohe Rexhep Mejdani.
Historia
Nëna e la 2-vjeç, kurse babai kur ishte 12 –vjeç.
Vështirësitë ekonomike e detyruan fillimisht të punonte si argat krahu në portin e Durrësit dhe më pas si portier te kinema “Republika” në Tiranë.
Fisi i tij me origjinë libohovite ishte e gjitha e shkolluar, kurse ai jetim bëri vetëm 4 klasë shkollë.
Tenton t’i hyjë artit në moshën 21-vjeçare, por e refuzojnë si të patalentuar.
Konkurron sërish dhe sërish refuzohet, në një listë humbësish që kryesohej edhe nga artisti i madh Naim Frashëri.
Me këmbënguljen e mësuesve të tyre, grupi i të patalentuarve me në krye Naim Frashërin dhe Kadri Roshin përkthejnë dhe vënë në skenë pjesën “Martesa e Gogolit”.
Suksesi i tyre me këtë shfaqje ishte aq i madh sa i pranuan menjëherë në Teatrin Popullor.
Djaloshit jetim Kadri Roshi nga Mallakastra iu hap kështu rruga për të treguar se çfarë ishte i aftë të bënte.
Sot vulën e tij e mbajnë mbi 180 role të fiksuara në memorjen e publikut në teatër dhe kinema.
Dramaturgu brazilian i komedisë “Dhelpra dhe rrushtë” tha: “E kam parë në shumë vende të botës, por Ezopin që mendova dhe shkruajta e gjeta te ky njeri”.
Konsiderohet një nga ikonat e kinematografisë shqiptare.
Prej vitit 1999 është shpallur “Nder i Kombit”.
Roshi ndërroi jetë në shkurt të vitit 2007 duke na lënë një pasuri të paçmueshme me personazhe të arritura artistikisht.
