Tregu shqiptar i punës po përjeton një rritje të ndjeshme të numrit të punonjësve të huaj, të cilët po angazhohen në sektorë të ndryshëm të ekonomisë, nga shërbimet dhe industria, deri te bujqësia.
Punonjës nga vende të ndryshme të botës po shfaqen gjithnjë e më shumë në ambiente si bare, restorante, biznese prodhuese, por edhe në profesione të specializuara, si inxhinierë apo staf për kujdesin ndaj fëmijëve dhe të moshuarve.
Gjatë të njëjtit vit janë dhënë rreth 14 mijë leje pune për herë të parë për shtetas të huaj, duke treguar rritjen e interesit për punësim në Shqipëri.
Pjesën më të madhe të kërkesave për punësim gjatë vitit 2025 e zunë shtetasit nga Filipinet dhe India. Secili prej këtyre vendeve përbënte rreth 18% të kërkesave të miratuara online.
Pas tyre renditen shtetasit nga Egjipti me 15% të kërkesave, Turqia me 9%, Kosova me 4% dhe Italia me 3%.
Në shifra konkrete, gjatë vitit 2025 u miratuan 3,251 leje pune për shtetas indianë, pothuajse dy herë më shumë se një vit më parë, ndërsa për shtetasit nga Filipinet u dhanë 3,279 leje pune.
Shtetasit e huaj që kërkojnë të punojnë në Shqipëri pajisen me Leje Unike, e cila përfshin procedurat për punësimin, vizën dhe qëndrimin në vend. Agjencia Kombëtare e Punësimit dhe Aftësive miraton pjesën e lejes së punës, ndërsa procedurat për vizën dhe qëndrimin përfundohen nga institucionet përkatëse të migracionit.
Shqiptarët e Kosovës dhe italianët me procedura më të lehtësuara
Shqiptarët e Kosovës dhe italianët përbëjnë një pjesë të rëndësishme të të huajve që jetojnë dhe punojnë në Shqipëri, por ndjekin procedura të ndryshme nga shtetasit e vendeve të treta.
Në vitin 2025, numri i shtetasve nga Kosova të pajisur me leje qëndrimi në Shqipëri arriti në 6 076 persona, rreth 22% e totalit të të huajve me leje qëndrimi. Krahasuar me vitin 2024, ky numër u rrit me 32%.
Falë marrëveshjes mes Shqipërisë dhe Kosovës të vitit 2022, qytetarët kosovarë mund të pajisen me leje qëndrimi biometrike 5-vjeçare, e cila shërben njëkohësisht edhe si leje pune. Procedura realizohet online dhe është më e thjeshtuar.
Pas Kosovës, numrin më të lartë të shtetasve të huaj me leje qëndrimi në Shqipëri gjatë vitit 2025 e kanë italianët, me 3 776 persona, ose rreth 14% të totalit. Krahasuar me vitin 2024, numri i tyre është rritur me 75%.
Si shtetas të Bashkimit Europian, italianët kanë një procedurë më të lehtësuar për punësim në Shqipëri. Ata nuk kanë nevojë për miratim të veçantë të punësimit nga institucionet e tregut të punës, por kryejnë deklarimin përkatës dhe gëzojnë të drejta punësimi të barabarta me qytetarët shqiptarë.
Sipas legjislacionit për të huajt, pas pesë vitesh qëndrimi të ligjshëm dhe të vazhdueshëm në vend, një shtetas i huaj mund të përmbushë kushtet për të përfituar leje qëndrimi të përhershme.
Rritja e numrit të punonjësve të huaj tregon ndryshimin gradual të strukturës së tregut shqiptar të punës, ku Shqipëria po bëhet një destinacion gjithnjë e më i preferuar për punonjës nga vende të ndryshme të Azisë, Europës dhe rajonit.
