Kryeministri Edi Rama ka publikuar në platformën Instagram një video prezantim, ku ekspertët e Agjencisë Kombëtare të Shoqërisë së Informacionit (AKSHI) paraqesin historinë e zhvillimit të Diellës dhe punën që qëndron pas realizimit të një prej projekteve më inovative të transformimit digjital në Shqipëri.
Diella, asistenti virtual i platformës e-Albania, është krijuar si një standard i ri në mënyrën se si qytetarët ndërveprojnë me shërbimet publike, duke sjellë një formë të re komunikimi mes qytetarit dhe administratës.
Sipas të dhënave të bëra publike nga ekspertët, Diella ka realizuar deri më sot rreth 3 milionë ndërveprime në platformën e-Albania. Ajo është rezultat i një vizioni që e sheh Inteligjencën Artificiale jo thjesht si një teknologji që funksionon në prapaskenë, por si një urë komunikimi inteligjente, natyrale dhe të besueshme mes qytetarëve dhe shtetit.
Rrugëtimi i zhvillimit të Diellës, sipas ekspertëve të AKSHI-t, ka treguar se modelet e avancuara të Inteligjencës Artificiale mund të zhvillohen dhe të performojnë me sukses edhe në gjuhën shqipe, duke krijuar një eksperiencë komunikimi të saktë, intuitive dhe të aksesueshme për çdo qytetar.
Mbi këtë bazë, projekti ka evoluar drejt sfidave më komplekse teknologjike, duke integruar analizën e dhjetëra mijëra akteve ligjore, arsyetimin dhe përpunimin e dokumenteve komplekse, teknologjitë e përpunimit të gjuhës natyrore, një identitet vizual 3D, të ndërtuar për ta bërë ndërveprimin me qytetarët më të qartë, më njerëzor dhe më të rrjedhshëm.
Pas çdo përgjigjeje të dhënë nga Diella qëndron një ekosistem i avancuar kërkimi, inxhinierie dhe inovacioni, ku bashkohen modelet gjuhësore, Inteligjenca Artificiale, grafika 3D, përpunimi i të folurës dhe dizajni i ndërveprimit.
Rezultati, sipas prezantimit, është më shumë sesa një produkt teknologjik. Ai përfaqëson një model të ri komunikimi, i ndërtuar për ta bërë marrëdhënien mes qytetarit dhe administratës publike më të thjeshtë, më efikase dhe më intuitive.
Në videon e publikuar nga kryeministri Rama prezantohet i gjithë rrugëtimi i zhvillimit të Diellës, nga ideja fillestare deri te puna teknike e ekspertëve që ka çuar në realizimin e këtij projekti të transformimit digjital në Shqipëri.
View this post on Instagram
