Nga Alfred Lela/
Një kthesë e papritur në qëndrimin e opozitës për Reformën në Drejtësi ka minuar fushën e procesit politik nëpër të cilën është ecur, në siklet e në rrena, që prej shtatorit. Ka penguar gjithashtu njëfarë reflektimi serioz mbi vizitën e Bashës në Amerikë. Pas lajmit që shpallte (më në fund!) konsensus për Byronë e Hetimit, e cila do të vendosej larg duarve dhe ndikimit të Ministrisë së Brendshme, mbërriti me po atë shpejtësi dhe befasi kundërlajmi. Në këto kushte, ja ku jemi në stinën e një ngërçi të dytë, i cili rrëzoi dy lajme të mira në favor të opozitës së Bashës: Vizitën në Amerikë dhe konsensusin politik.
Do të qe e natyrës së kotësisë përpjekja për të zbuluar psetë e busullës së çakorduar, por pasojat fillojnë me mbledhjen e supeve, habinë dhe përfundojnë më së paku me keqardhjen. Të tjera do të vijnë. Dashamirët e Bashës, shefit të PD, ata që shohin te ai gjasat dhe trajtat e një opozite të re, joradikale, reaktive dhe reflektive, por jo atomike, prodhuese të një alternative, besoj janë më të keqardhurit dhe të hutuarit.
Po çfarë ka humbur opozita dhe personalisht z. Basha në këtë kthesë të fortë? Më e para është ajo që mund të quhet ‘vizita e anuluar në Amerikë’. Një tur serioz, takimesh dhe kontaktesh dinjitoze, të paprecedenta për një shef opozite në fillim të vitit të tretë si i tillë, u la në hije nga një lëvizje kontrapedal që nxirrte në pozicion jashtë loje veten, por gjithmonë më shumë se kaq. Mesazhet që ka marrë në Amerikë, por edhe ato që vetë Basha dha në deklaratat prej atje stonojnë me aksionin politik të pas kthimit.
E dyta e humbur në shqipen konfuze të politikës së brendshme është mundësia e konsensusit, një pakti me mazhorancën, jo sa për të larë gojën, por për një reformë që është sak e rëndësishme për vendin. Edhe sikur të mos kish me vete një buldozer mbështetjeje që vjen nga Shtetet e Bashkuara të Amerikës së pari, dhe nga kushtëzimi i Bashkimit Europian për çeljen e negociatave të anëtarësimit, së dyti.
Kësisoj, z. Basha ka humbur në një dorë të vetme, si në një trill pokeri Texas hold ‘em, dy gjëra të herës së parë për nga precedenca: Vizitën në Amerikë dhe konsensusin politik të brendshëm. Një gjë fort e rrallë në Shqipëri.
Së treti, ai ka humbur edhe mundësinë për të gabuar. Axhendat radikale janë rrugë politike ku të pret rreziku i gabimit në çdo hap. Po, ato mund të përfundojnë me fitore të mëdha, por po aq të mëdha kanë edhe humbjet. Shqipëria e ka një përvojë të tillë mbi shpinë, dhe ajo është krusma e ‘97-ës. Kushdo flet sot për ‘revolucion demokratik’ është duke përsëritur diskurin e Komiteteve të Shpëtimit Publik, ish-komunistëve, ish-ushtarakëve dhe Rexhep Qosjes. Dhe, ata që flasin këtë gjuhë përvëlimi marksist janë, ironikisht, të njëjtët kundër të cilëve u sendërtua ai ‘revolucion demokratik’. I padrejtë, i dhunshëm, ahistorik. Viktimat qenë ndër shqiptarët, ama.
Futja, ‘mish derri’, e Rakip Sulit dhe mandatit të tij në debatin e Reformës në Drejtësi është në çdo rast një artific. Një casus belli natyra belicioze e të cilit lexohet thjesht, si të ishte manuali i përdorimit mbi një kondom.
Është pra prezervativi i një balance të brendshme me sa duket, por aspak politike. Në kuptimin që politika dhe politikat duhet të prodhojnë zgjidhje. Mund të jetë diçka personale, por, nothing personal, është e gabuar.
Ajo që prodhoi opozita e re e z. Basha, është riprodhim i opozitës së vjetër të z. Rama. Parabola ‘për mandatin e Rakip Sulit fundosim Reformën në Drejtësi’ është identike me përmallimin, qesharak dhe cinik njëherësh, e Edi Ramës kryeopozitar ‘nuk e lëshojmë Fierin, as për Brukselin’.
Për ata që nuk e mbajnë mend, bëhet fjalë për një mish-mash në Fier dhe pretendimet e dy kryetarëve, njëri i PS e tjetri i PD, për postin e kreut të Këshillit të Qarkut. Një truku të PD-së në politikën lokale, PS i gjeti një hakmarrje ndërkombëtare duke penguar konsensusin parlamentar për tri ligje që do i jepnin Shqipërisë statusin e vendit kandidat.
Ka kaq shumë gjëra nga të cilat na duhet të çlirohemi: Për në Bruksel na pengon Fieri, për në Washington Suli, e kështu me radhë…/Mapo/
