Ngushtica e Hormuzit nuk është vetëm një nyje kyçe për transportin global të hidrokarbureve dhe plehrave kimike. Ajo është gjithashtu një rrugë turistike mahnitëse.
Çdo vit përshkohet nga mijëra jahte luksoze që lundrojnë pranë brigjeve për të shijuar ngjyrat e mrekullueshme të gadishullit Musandam me fiordet e tij, deri te ujërat që përballen me brigjet spektakolare shkëmbore të Omanit.
Anija dhe udhëtimi
Të dhënat e monitorimit detar tregojnë se gjatë fundjavës së kaluar një superjaht i lidhur me Rusinë arriti të kalojë dyfishin e bllokadës detare, duke u nisur nga Dubai dhe duke mbërritur në Oman. Kjo anije luksoze lidhet me një manjat pranë Vladimir Putin.
Anija 142 metra e gjatë “Nord” i atribuohet manjatit Aleksej Mordashov, i sanksionuar dhe i afërt me Kremlinin. Të premten, jahti u nis nga Emiratet drejt zonës Al Mouj në Oman. Është një nga shumë pak anije private që kanë arritur të shmangin 9 javë bllokadë detare, e cila ka bllokuar qindra anije dhe rreth 2 400 marinarë.
Kush është Mordashov
Mordashov nuk rezulton pronari zyrtar i jahtit, por në vitin 2022 anija u regjistrua në emër të një kompanie në pronësi të bashkëshortes së tij. Sipas të dhënave të platformës MarineTraffic, “Nord”, me një vlerë mbi 500 milionë dollarë, u largua nga Dubai të premten në mbrëmje, 24 prill, dhe mbërriti në Al Mouj të dielën në mëngjes, 26 prill.
Alexey Alexandrovich Mordashov është aktualisht njeriu më i pasur në Rusi, me një pasuri të vlerësuar nga Forbes në mars 2026 rreth 37-39 miliardë dollarë. Kjo ngjarje e rikthen atë në qendër të vëmendjes ndërkombëtare.
Ai konsiderohet pjesë e rrethit të ngushtë të Putinit dhe zotëron aksione në Bank Rossiya, e cilësuar nga BE si banka personale e zyrtarëve të lartë rusë. Ai u sanksionua nga SHBA-të, BE dhe Mbretëria e Bashkuar pas pushtimit të Ukrainës në vitin 2022. Sanksionet përfshijnë edhe familjen e tij, veçanërisht bashkëshorten Marina Mordashova, në emrin e së cilës është regjistruar formalisht jahti për të shmangur sekuestrimin.
Si ishte e mundur?
Disa anije kanë arritur të kalojnë bllokadën në javët e fundit me mënyra të ndryshme: duke shfrytëzuar hapje të përkohshme ose duke përdorur lidhje me qeveri dhe duke paguar tarifa të larta kalimi.
Udhëtimi ndodhi vetëm disa orë pas vizitës së ministrit të Jashtëm iranian Abbas Araghchi në Shën Petersburg për t’u takuar me Putinin, një sinjal se marrëdhëniet mes dy vendeve mbeten të forta.
Hipoteza më e mundshme është që Irani ka zgjedhur të mbyllë njërin sy për këtë anije.
