Shqipëria ka përditësuar listën e mallrave dhe teknologjive me përdorim të dyfishtë, duke forcuar kontrollin mbi produkte që mund të përdoren si për qëllime civile, ashtu edhe ushtarake. Në Fletoren Zyrtare është publikuar vendimi i Këshillit të Ministrave që përafron legjislacionin shqiptar me rregulloren më të fundit të Bashkimit Europian për eksportet sensitive.
Lista e re përfshin qindra materiale, pajisje dhe teknologji të avancuara, nga pajisjet bërthamore, sistemet e navigimit dhe radarët, deri te inteligjenca elektronike, dronët, lazerët industrialë dhe pajisjet për sigurinë informatike. Në dokument përmenden edhe teknologji që lidhen me monitorimin e komunikimeve, sistemet satelitore, pajisje për përgjime elektronike dhe komponentë që mund të përdoren në industrinë ushtarake apo në prodhimin e armëve.
Në listë përfshihen teknologji të avancuara të telekomunikacionit dhe “sigurisë informative”, ku hyjnë programe kompjuterike, sisteme enkriptimi, pajisje survejimi elektronik dhe mjete që mund të përdoren për ndërhyrje në rrjete apo për mbrojtje kibernetike. Dokumenti përfshin gjithashtu sensorë, sisteme radarike dhe pajisje të përdorura në aviacion dhe në industrinë hapësinore.
Pjesë e listës janë edhe materiale kimike, biologjike dhe pajisje laboratorike që mund të përdoren për kërkime shkencore, por që në rrethana të caktuara mund të kenë edhe përdorim ushtarak. Për këtë arsye, transferimi i tyre jashtë vendit do të jetë subjekt i autorizimeve dhe kontrolleve shtetërore.
Sipas qeverisë, ndryshimet synojnë të harmonizojnë Shqipërinë me standardet e Bashkimit Europian dhe të rrisin sigurinë në transferimet ndërkombëtare të teknologjive sensitive, në një kohë kur kontrolli mbi eksportet strategjike dhe siguria kibernetike po marrin gjithnjë e më shumë rëndësi në nivel global.
