Perimet zënë një peshë të konsiderueshme në furnizimin ushqimor në vend, ku sipas të dhënave të Organizatës së Ushqimit dhe Bujqësisë (FAO), për vitin 2023 rezultojnë disa kategori kryesore që së bashku përbëjnë qindra kilogramë perime të disponueshme për frymë gjatë vitit.
Sipas bilanceve ushqimore të FAO-s, domatet mbeten ndër perimet më të rëndësishme. Në vitin 2023, për çdo banor në Shqipëri rezultojnë rreth 97.2 kilogramë domate në vit, një tregues që reflekton rolin e tyre të fortë në dietën tradicionale dhe në përdorimin e përditshëm në kuzhinë.
Një peshë të konsiderueshme zënë edhe patatet, me rreth 51.8 kilogramë për frymë në vit. Patatet vazhdojnë të mbeten një nga produktet bazë ushqimore, që përdoret gjerësisht si në familje ashtu edhe në sektorin e shërbimeve ushqimore.
Ndërkohë, qepët përbëjnë një tjetër komponent të rëndësishëm të konsumit të përditshëm, me rreth 39.3 kilogramë për frymë në vit. Kjo kategori reflekton përdorimin e tyre pothuajse në çdo gatim, duke i bërë një element të domosdoshëm në strukturën e ushqimit.
Në krahasim me këto produkte, fasulet zënë një pjesë më të vogël, me rreth 6.2 kilogramë për frymë në vit furnizim i disponueshëm për konsum.
Në total, të dhënat tregojnë se furnizimi me perime në Shqipëri është i shpërndarë në disa kategori kryesore, por dominimi i kategorisë “perime të tjera” tregon se një pjesë shumë e madhe e konsumit vjen nga produkte të ndryshme sezonale, si speca, kunguj, kastravecë, patëllxhanë dhe zarzavate të tjera me një peshë prej 246 kilogramë për frymë në vit
Të dhënat bazohen në bilancet ushqimore të FAO-s dhe matin sasinë e perimeve të disponueshme për konsum për frymë gjatë një viti. Ky tregues përfshin prodhimin vendas dhe importet, por nuk përfaqëson domosdoshmërisht sasinë që konsumon realisht çdo individ, pasi nuk përfshin mbetjet ushqimore në nivel familjar.
