Pesëdhjetë shqiptarë të burgosur aktualisht në burgjet e Britanisë së Madhe do të dërgohen në burgjet shqiptare për të vuajtur dënimin, sipas një raportimi të gazetës britanike Daily Mail. Dhjetë të arrestuarit e parë do të dëbohen me fluturim çarter në javët e para të janarit.
Të 50 të burgosurit do të vuajnë dënimin e plotë të dhënë nga gjyqtarët e Mbretërisë së Bashkuar. Të dënuarit shqiptarë përbëjnë pothuajse 10% të shtetasve të huaj në burgjet britanike. Të burgosurit kanë dalë vullnetarë për t’u transferuar nga burgjet britanike në ato shqiptare si pjesë e një marrëveshjeje të re.
Është “hapi i parë” i dy shteteve për të hequr qindra të dënuar shqiptarë të burgosur, duke kursyer miliona paund para të taksapaguesve britanikë. Deri më tani, dëbimet e Home Office në Tiranë përfshinin ose kriminelë që kishin vuajtur tashmë dënimin në MB, ose njerëz që kaluan ilegalisht në Britani pasi kaluan Kanalin Anglez me anije.
Një burim i qeverisë shqiptare tha se bisedimet midis Ministrisë së Drejtësisë së Britanisë dhe ministrit shqiptar Ulsi Manja kishin çuar në një marrëveshje për transferimet e para. “Kemi kapacitete të kufizuara në burgjet tona. Por për të treguar se jemi gati për të përmbushur detyrimet tona ndaj Britanisë së Madhe, ne kemi rënë dakord të pranojmë 50 shqiptarë që kanë shprehur vetë gatishmërinë për t’u kthyer”, shtoi burimi.
1336 shqiptarë të burgosur në Britani
Shtetasit shqiptarë përbëjnë rreth 10% të të huajve të mbajtur në burgjet angleze dhe të Uellsit. Në numërimin e fundit kishte më shumë se 1,336 shqiptarë të burgosur në Britani, numri më i madh i të dënuarve jashtë shtetit pas hekurave.
Ndonëse grupi i parë i të dëbuarve ka pranuar vullnetarisht të kthehet, marrëveshja Shqipëri-Britani thotë se të arrestuarit në të ardhmen mund të transferohen pa pëlqimin e tyre. Të dënuarit shqiptarë që vuajnë dënimet më të gjata të burgut janë dy vrasës dhe tre bos droge, të cilët aktualisht po vuajnë gjithsej 143 vjet – me një kosto për publikun britanik prej 6,864,000 paund me çmimet e sotme.
Sipas zyrtarit të shtypit konservator, Lee Anderson: “Ky është një lajm i mrekullueshëm. Ne nuk i duam këta njerëz në burgjet tona dhe nuk i duam këta njerëz në vendin tonë. Ata nuk po sillen sipas rregullave tona dhe duhet të kthehen nga kanë ardhur në vend që të lejohen të jetojnë në kurriz të taksapaguesve britanikë”.
Më shumë se 13,000 shqiptarë kanë mbërritur në Britani nga Franca veriore me anije këtë vit dhe tani përbëjnë rreth 1 në 3 mbërritje në ishull në përgjithësi.
Bllokim në ofrimin e azilit
Në fillim të këtij muaji, kryeministri britanik Rishi Sunak përshkroi se si një marrëveshje e fundit me Tiranën mund të ndihmojë në luftën kundër imigracionit të paligjshëm. Ai deklaroi se ndryshimet që po përgatiten do të lejojnë që azili për shqiptarët të shpallet “qartësisht i pabazuar. Dhe shtoi se “Në muajt në vijim mijëra shqiptarë do të kthehen në shtëpitë e tyre”.
Ambasadori i Shqipërisë në Britani, Qirjako Qirko, ka pranuar se emigrantët nga vendi i tij “po shtiren” si viktima të skllavërisë moderne. Qirjako Qirko u tha deputetëve se shumë shqiptarë që kalojnë Kanalin me varka të vogla janë “thjesht emigrantë ekonomikë”. Ai gjithashtu deklaroi vazhdimisht se vendi i tij, Shqipëria, ishte “e sigurt” – që do të thotë se nuk kishte nevojë që qytetarët e saj që kërkonin azil të largoheshin. /tesheshi.com/
