Nga Skënder Minxhozi/
Jo pak veta kanë shtrembëruar dje buzët teksa kanë parë një video që tregonte sesi kryetari i ri i bashkisë së Tiranës Erion Veliaj shkonte në punë me autobusat e linjës. Një pjesë e tyre kanë kujtuar se ky është një ekzibicionizëm i zakonshëm për kryebashkiakun, i cili ka trashëguar që nga koha e “Mjaftit”, një stil pune që bazohet tek mediatizimi i fortë i aktivitetit të tij publik e politik. Dikush tjetër ka pyetur jo pa të drejtë, nëse kreu i bashkisë do ta kryerjë këtë ritualin e autobusave vetëm ditën e parë, apo do të përdorë edhe në vgijim linjat urbane të qytetit.
Veliaj ndau edhe kësaj rradhe qytetarët, siç ka ndodhur gjatë gjithë gjatësisë së karrierës së tij prej më shumë se një dekade në jetën publike. Por sot ai bëri diçka që është diametralisht e kundërt me shoun e autobusave. Në një takim me ministren Gjermeni, Veliaj shpalli pezullimin e planit urbanistik të bashkisë së vjetër të Tiranës si pjesë e nisjes së një studimi tërësor për 26 njësitë e bashkisë së re. Ky vendim zhbën kështu praktikisht planin e shumëpërfolur urbanistik të paraardhësit Lulzim basha, çka ka sjellë edhe ngrirjen e lejeve të ndërtimit që ishin dhënë në bazë të atij Plani.
Është ky një gjest që, nëse do të respektohet në mënyrë rigoroze, do të sjellë ndalimin e kafshimit që qyteti nisi të pësonte nga disa projekte makabër, të cilat flluan të betonizojnë pjesë delikate të strukturës urbane të kryeqytetit. Më së pari shpresohet që vendimi i Veliajt të ndalë qysh në fillimet e tij, agresionin e betonarmesë mbi hapësirën poshtë Digës së Liqenit. Një temë e nxehtë që ka sensibilizuar prej muajsh ambjentalistët dhe qytetarët e thjeshtë të Tiranës. Shpresohet më pas që ky vendim të ngrijë dhe mundësisht të anullojë një herë e mirë, planet për të nisur ndërtimet në zona të tilla si Rruga e Elbasanit e Blloku, pa harruar as projektin e fundit që e kthen hyrjen në Parkun e Liqenit, anash Universitetit, në një bllok të ri ndëtimesh, krejt absurd dhe pa sens.
Veliaj e nisi ditën e parë të punës me kurdisjen e orës së Kullës së Sahatit dhe ardhjen në punë me autobusin e linjës. Ndërsa në ditën e dytë vendosi të përballet me lobin e ndërtuesve. Dy veprime, njëri simbolik, e tjetri thelbësor e i guximshëm, të cilët mesa duket përbëjnë një zgjatim të asaj që pamë gjatë dy vjetëve të drejtimit prej tij të Ministrisë së Mirëeqnies sociale. As që na duhet fare me çfarë do të vijë në punë kryetari i ri i bashkisë, por na duhet që çke me të se çfarë do të bëjë ai me dosje si kjo që sapo pezulloi.
