Këshilli i Lartë i Prokurorisë ka emëruar Arben Krajën si drejtues të Strukturës së Posaçme Anti Korrupsion.
Kraja mori 6 vota nga anëtarët e KLP ndërsa mundi në këtë garë dy kandidatët e tjerë Ervin Kondili dhe Altin Dumani.
Prokurori në Prokurorinë e Përgjithshme arriti të merrte 6 votat që i duheshin nga anëtarët e KLP-së për të marrë këtë mandat për një afat 3 vjeçar pa të drejtë rizgjedhje.
Por kush është Arben Kraja
Ai është 47 vjeç dhe nga Shkodra. Arben Kraja, prokuror në Prokurorinë e Përgjithshme prej më shumë se 15 vitesh, kaloi me sukses përballjen e parë me Vettingun në Komisionin e Pavarur të Kualifikimit.
Kraja e ka filluar karrirën e tij në organin e akuzës në vitin 1993 dhe prej dy dekadash punon në Prokurorinë e Përgjithshme, ku ka drejtuar sektorë të rëndësishëm si task-forca kundër krimit dhe korrupsionit.
Analiza e pasurisë është një ndër tre shtyllat e rivlerësimit për prokurorët, së bashku me kontrollin e figurës dhe vlerësimin e aftësive profesionale.
Kraja është i njohur si prokurori që hetoi dosjen hetimore për abuzimet me fondet e rrugës Durrës-Kukës, ku u hetua edhe kryetari i Partisë Demokratike, Lulzim Basha, shkruan javanews.al
Ai gjithashtu ka qenë prokuror i çështjes së ish-gjyqtares së Lartë, Majlinda Andrea, e shpallur fajtore për afera korrupsioni.
Arben Kraja njihet edhe për dosjen e ish-deputetit Armando Prenga për incidentin e Lagunës së Patokut, por edhe për ish-deputetë të tjerë të gjykuar në Gjykatën e Lartë për akuzën e shpifjes.
Tanimë prokurori Kraja ka në ‘duar’ dosjen e kandidatit socialist për Shkodrën, Valdrin Pjetrin, i cili akuzohet për falsifikim të formularit të dekriminalizimit.
/javanews/ g.kosovari
