Çdo vit rreth 20 mijë persona kanë nevojë për gjak. Kërkesat më të larta i kanë ata që vuajnë nga talasemia, sëmundjet kronike si dhe të aksidentuarit.
“Kërkesat dhe nevojat për njësi gjaku janë gjithnjë në rritje, ne shohim që sëmundjet malinje janë gjithnjë në rritje dhe kanë nevojë për njësi gjaku, aksidentet po ashtu, janë në rritje. Janë 600 fëmijë talasemik të cilët kanë nevojë për njësi gjaku në mënyrë periodike, megjithatë migrimi dhe emigrimi i popullatës vazhdon, dhe për këtë kategori të pacientëve”, tha koordinatorja e dhurimit të gjakut te Kryqi i Kuq, Blerta Ndrekaj.
Dhurimi i gjakut gjithashtu sipas mjekëve jo vetëm do të shpëtonte jetë por edhe do të përmirësonte shëndetin e tyre.
“Sipas studimeve të fundit personat të cilët dhurojnë gjak në mënyrë periodike, vuajnë më pak nga sëmundjet kancerogjene sepse dhurimi i gjakut normalizon nivelet e hekurit në organizëm dhe shumë lloj kancerash janë të lidhura me nivelet e hekurit në organizëm . Kjo është një thirrje për qytetarët shqipëtar, përvec kësaj bënë mirë për hipertensionin, bën mirë për sëmundjet e arterieve kroronare, për atakun kardiak, që ul riskun deri në 80%”, tha Ndrekaj.
Ejona Braho mjeke pranë qendrës kombëtare të transfuzionit thotë se bankat e gjakut janë të pranishme në të gjithë Shqipërinë për ata të cilët shprehin dëshirën për të qenë dhurues.
“Kemi fatin e mirë që në të gjithë Shqipërinë janë të vendosur bankat e gjakut, pranë spitaleve rajonale por jo vetëm, në qoftë se kanë dëshirën për të dhuruar jo vetëm familjarë, por edhe vullnetarë, mund të ofrohen pranë këtyre bankave të gjakut. Miqtë apo shokët të cilët kanë nevojë për njësi gjaku, mund të bëjnë thirrje të gjithë personave të cilët gëzojnë shëndetin e plotë, të cilët janë optimistë për të ndihmuar, për të ofruar, për të gjithë të tjerët janë mëse të mirëpritur”, tha mjekja transfuziologe, Ejona Braho.
Mjekët bëjnë thirrje për sa më shumë dhurime, pasi me anë të një njësie gjaku shpëtohen 3 jetë njerëzish./vizionplus.tv
