“Ditët kur udhëheqësit terroristë gëzonin imunitet në çdo cep të botës kanë përfunduar”. Kështu deklaroi kryeministri izraelit Benjamin Netanyahu pasditen e kësaj të marte, 9 shtator, pas sulmit të ushtrisë izraelite në Doha të Katarit, kundër udhëheqjes së Hamasit.
“Shin Bet dhe IDF e kryen misionin në mënyrën më të mirë dhe më precize, duke impresionuar mbarë botën”, theksoi ai. Sipas kryeministrit izraelit, sulmi në Doha ishte një operacion i saktë kundër udhëheqësve të Hamasit që, sipas tij, kanë nisur dhe festuar masakrën e 7 tetorit.
“Jemi në mes të një fushate për të mposhtur Hamasin dhe për të liruar të gjithë pengjet. Kemi dhënë goditje të forta ndaj të gjitha pjesëve të boshtit të së keqes. Armiqtë tanë duhet ta dinë një gjë: që prej themelimit të shtetit të Izraelit, gjaku hebre nuk do të derdhet”, tha ai.
Duke iu drejtuar popullatës civile në Rripin e Gazës, Netanyahu kërkoi nga Hamasi të “pranojë propozimin e presidentit Trump” për një armëpushim dhe lirimin e pengjeve. “Lufta mund të përfundojë menjëherë, ne tashmë kemi pranuar parimet e përcaktuara nga Trump për përfundimin e saj”, tha Netanyahu.
Ndërsa civilëve të Gazës u premtoi një të ardhme ndryshe: Mos u shqetësoni, ju mund t’ia dilni dhe ne mund t’ju premtojmë një të ardhme ndryshe.
Netanyahu kujtoi se parimet e propozuara nga Trump përfshijnë “lirimin e menjëhershëm të të gjithë pengjeve tanë dhe parime të tjera për t’i dhënë fund luftës që ka nisur Izraeli.”
Propozimi më i fundit nga Shtetet e Bashkuara parashikon që Hamasi të dorëzojë të gjithë 48 pengjet e mbetura, të gjallë dhe të vdekur, ditën e parë të armëpushimit. Gjatë kësaj pauze do të zhvilloheshin negociatat për përfundimin e luftës.
Ndërkohë, Hamasi ka deklaruar se pesë nga anëtarët e tij janë vrarë gjatë sulmit izraelit në kryeqytetin e Katarit. Grupi konfirmon se djali i udhëheqësit të Hamasit, Khalil Al-Hayya, është mes viktimave, së bashku me tre pjesëtarë të stafit të zyrës së tij. Katari ka njoftuar se një pjesëtar i forcave të tij të sigurisë është vrarë gjithashtu.
Sipas Hamasit, Izraeli ka dështuar në përpjekjen për të “vrarë” delegacionin negociator. Grupi shton se mban përgjegjësi të përbashkët edhe Shtetet e Bashkuara për këtë sulm.
