Kryeministri izraelit Benjamin Netanyahu ka deklaruar se Izraeli e ka refuzuar planin e fundit 15-pikësh për Gazën, të mbështetur nga Presidenti amerikan Donald Trump, duke këmbëngulur se trupat izraelite nuk do të tërhiqen nga territori palestinez përpara çarmatimit të plotë të Hamasit.
Duke folur për herë të parë drejtpërdrejt për dokumentin e ri të propozuar nga “Bordi i Paqes” i Trump, Netanyahu tha se Izraeli e kundërshton atë.
“Dua të jem i saktë këtu: Izraeli e hedh poshtë dokumentin me 15 pika”, deklaroi ai.
Netanyahu theksoi se ushtria izraelite nuk do të largohet nga Gaza derisa Hamasi të jetë çarmatosur plotësisht. Sipas tij, kjo nënkupton eliminimin e të gjitha armëve të grupit dhe jo një çarmatim formal apo të pjesshëm.
Kryeministri izraelit tha gjithashtu se çështja po diskutohet me administratën amerikane, por bëri të qartë se jo të gjitha propozimet e Washingtonit janë të pranueshme për Izraelin.
“Ata kanë ide, disa prej të cilave janë të pranueshme për ne dhe disa jo, dhe ne dimë si t’i kundërshtojmë këto gjëra”, tha Netanyahu.
Ai shkoi edhe më tej në qëndrimin e tij politik, duke deklaruar se për sa kohë të jetë kryeministër, nuk do të lejojë krijimin e një shteti palestinez, as në Gaza dhe as në Bregun Perëndimor.
Deklaratat e Netanyahut vijnë pas njoftimit të Trump për një marrëveshje që synon çarmatimin e Hamasit dhe grupeve të tjera të armatosura në Gaza, si pjesë e përpjekjeve për të kaluar në fazat e mëtejshme të planit të paqes.
Hamasi, nga ana tjetër, ka deklaruar se mbetet i angazhuar ndaj planit, por kërkon që Izraeli të ndalojë sulmet në Gaza dhe të tërheqë forcat e tij deri te “vija e verdhë”, në përputhje me marrëveshjen e armëpushimit.
Një zyrtar i lartë i Hamasit, Bassem Naim, u ka bërë thirrje ndërmjetësve dhe garantuesit amerikan që të ushtrojnë presion mbi qeverinë izraelite për të mos penguar procesin. Përplasja mbi rendin e hapave kryesorë, çarmatimi i Hamasit dhe tërheqja e forcave izraelite, mbetet një nga pengesat kryesore për zbatimin e planit të ri për Gazën.
