Kryeministri izraelit Benjamin Netanjahu (Netanyahu) ka deklaruar se u ka bërë me dije Shteteve të Bashkuara të Amerikës se ai kundërshton krijimin e një shteti palestinez, ndërsa ndaloi përpjekjet e tyre për imponimin e një realiteti që do dëmtonte sigurinë e Izraelit.
Në një konferencë shtypi, Netanjahu u zotua të vazhdojë me ofensivën në Gaza “deri në fitoren e plotë”, shkatërrimin e Hamasit dhe kthimin e pengjeve të mbetura izraelite, duke shtuar se mund të duhen ende shumë muaj.
“Ky është një kusht i domosdoshëm dhe bie ndesh me idenë e sovranitetit (palestinez). Çfarë duhet bërë? Unë ua them këtë të vërtetë miqve tanë amerikanë dhe gjithashtu ndalova përpjekjen për të na imponuar një realitet që do të dëmtonte sigurinë e Izraelit”, tha ai.
Me gati 25,000 palestinezë të vrarë në Gaza, sipas ministrisë së shëndetësisë të drejtuar nga Hamasi, dhe 85% të popullsisë së rripit të zhvendosur, Izraeli është nën presion të madh për të frenuar ofensivën e tij dhe për t’u angazhuar në bisedime kuptimplote për një fund të qëndrueshëm të luftës.
Aleatët e Izraelit, duke përfshirë SHBA-në dhe shumë prej armiqve të tij, kanë kërkuar një ringjallje të “zgjidhjes së dy shteteve” prej kohësh në gjumë, në të cilën një shtet i ardhshëm palestinez do të ulet krah për krah me një izraelit.
Shpresa në shumë qarqe është se kriza aktuale mund t’i detyrojë palët ndërluftuese të kthehen në diplomaci, si alternativa e vetme e qëndrueshme ndaj cikleve të pafundme të dhunës. Por nga komentet e Netanjahut, qëllimi i tij duket krejt i kundërt.
Netanjahu tha se Izraeli duhet të ketë kontroll të sigurisë mbi të gjithë tokën në perëndim të lumit Jordan, e cila do të përfshijë territorin e çdo shteti të ardhshëm palestinez.
/a.r
