Analisti Plator Nesturi ka deklaruar në studion e emisionit “3D” në RTSH 1 se me vizitën e presidentit ukrainas, Zelenski në Tiranë, Bashkimi Evropian krijon një fushëpamje më të madhe në rajonin e Ballkanit Perëndimor.
Sipas Nesturit, pavarësisht se vëmendja më e madhe është në Gaza aktualisht, BE mbetet e fokusuar te Ukraina.
“Bashkimi Evropian ndoshta kërkon një mur mbrojtje sigurie dhe solidariteti. Në këtë kuadër, kjo i jep edhe një garanci dhe një stabilitet e një mbështetje totale lidhur me çfarë po ndodh. Padyshim që Bashkimi Evropian është e fokusuar te Ukraina se është në dyert e saj pavarësisht se Gaza merr vëmendje më të madhe”, u shpreh Nesturi.
Nesturi vuri në dukje gjithashtu se Shqipëria në këtë mes është e privilegjuar pasi ndodhet në një front me Aleancën e Atlantikut të Veriut dhe politikat e Këshillit të Sigurimit.
“Shqipëria në këtë mes ndihet e privilegjuar sepse së pari ajo i ka bërë detyrat e saj, jo vetëm në sensin e mbështetjes dhe vënies në një front, edhe në Këshillit e Sigurimit, në të gjitha procedurat lidhur me Ukrainë. Nuk është ky samit që e vendos Shqipërinë si një pol i rëndësishëm i këtij rajoni, por kjo e vijon më tej rëndësinë si në kuadër të NATO-s ashtu edhe të partnerëve ndërkombëtarë.
Në këtë mënyrë, kjo i hap rrugën solidarizimit, por kjo BE e cila është e angazhuar me Ukrainën, i krijon një fushëpamje më të madhe edhe rajonit, në situatën në të cilën ndodhet edhe vetë kontinenti ynë”, theksoi Nesturi.
/a.r
