Kanë mbetur më pak se 24 orë për t’u njohur me kreun e ri të Federatës Shqiptare të Futbollit.
Tre kandidatë, tre platforma, një ditë dhe vetëm njëri prej tyre do të drejtoj institucioni qeverisës të futbollit shqiptar për 4 vitet e ardhshme.
Presidenti aktual, Armand Duka, kërkon një mandat të 5-të, duke u bazuar në progresin e futbollit shqiptar nën drejtimin e tij, ndërsa rivali kryesor Bashkim Fino, që vjen nga politika, premton ndryshim të mënyrës së menaxhimit.
Në garë për të qënë në krye të sportit shqiptar është edhe ish-gjyqtari Shpëtim Hala që ndryshe nga Duka e Fino ka vendosur të bëj “propagandë” në heshtje, pa hedhur “baltë” mbi kandidatët tjerë.
Mbledhja më e rëndësishme e futbollit shqiptar do të nisë që nga e ora 9-të e mëngjesit të kësaj të mërkure, në hotel “Adriatik” në Durrës dhe rendi i ditës është padyshim zgjedhja e presidentit të ri të Federatës së Futbollit.
Por si do të veprohet për të zgjedhur presidentin e ri të FSHF-së?
Statuti përcakton qartë se për t’u zgjedhur president, kandidati ka nevojë për 2/3 e votave të vlefshme, dhe nisur nga shifra e 66 anëtarëve me të drejtë vote do të thotë se duhen 44 vota.
Në rast se asnjë prej kandidatëve nuk arrin të sigurojë këtë shumicë të përcaktuar, atëherë zhvillohet një raund i dytë , 24 orë pas atij të parit, midis dy kandidatëve që kanë marrë më shumë vota në raundin e parë. Nëse zgjedhja e presidentit bëhet në raundin e dytë, aty, kandidati fitues duhet të marrë 50% të votave+1 për të qënë ai në krye të federatës për 4 vitet e ardhshme. (Ora News)
