Për ditën e hënë është caktuar seanca e radhës plenare në Kuvendin e Kosovës. Sipas agjendës së shpallur në ueb-faqen e Kuvendit të Kosovës, ku pritet të diskutohen 28 pika të rendit të ditës, pritet të jetë një nga seancat më të gjata. Kurse në anën tjetër, e tëra mund të zgjas vetëm pak minuta nëse deputetët e opozitës vazhdojnë me bllokimin e punimeve siç kanë bërë tash e rreth 3 muaj.
Pikat të cilat do të sjellin interes sipas ministrit të Financave, Avdullah Hoti dhe shefit të GP të PDK-së, Adem Grabovci janë Shqyrtimi i dytë i Projektligjit për Buxhetin e Republikës së Kosovës për vitin 2016, që është pika e katërt me radhë, dhe Shqyrtimi i dytë i Projektligjit për ndryshimin dhe plotësimin e Ligjit për Menaxhimin e Financave Publike dhe Përgjegjësive, që është e 19-ta me radhë, raporton Koha.net.
Ministri i Financave në Qeverinë e Kosovës, Avdullah Hoti në një postim në llogarinë e tij në Facebook ka vënë theks të veçantë tek pika e Ligjit për Menaxhimin e Financave Publike dhe Përgjegjësive që, sipas tij, me këtë bëhet e mundur që Kosova të hyjë në hua tek institucionet financiare ndërkombëtare për të financuar projekte të mëdha kapitale (p.sh. sistem të ujitjes së tokave bujqësore, hekurudha, rrjeti energjetik, etj.).
Ndërsa shefi i GP të PDK-së, Adem Grabovci në një intervistë për kosovapress, është fokusuar tek Projektligji për Buxhetin e Republikës së Kosovës për vitin 2016, i cili për Grabovcin është dokumenti më i rëndësishëm që ka ndikim në secilën familje.
“Pa aprovimin e buxhetit, do të paralizohet në tersi dhe shteti”, ka thënë Grabovci.
Në anën tjetër ministri Hoti ka thënë se borxhi i përgjithshëm i Kosovës është rreth 728 milionë euro, që i bie të jetë rreth 12.6% e GDP-së që ka Kosova. Ky borxh është më i ulëti në rajon, që fillojnë nga Maqedonia me 37.3% e deri tek Shqipëria me 73.6%. Sipas Hotit, ky borxh jep hapësirë të mjaftueshme për të marrë kredi “VETËM për qëllime zhvillimore”.
