Ervin Dervishi, specialist i sigurisë rrugore në Drejtorinë e Përgjithshme të Policisë së Shtetit deklaron se krahasuar me të njëjtën periudhë të vitit të kaluar, këtë vit në dy muaj qershor-korrik ka shtim të numrit të aksidenteve. I ftuar në News24, Dervishi nuk ka folur vetëm për shifra dhe statistika, por edhe për përgjegjësitë që duhet të marrin të gjitha institucionet, jo vetëm policia.
“Kemi një shtim të fluksit të mjeteve dhe trafikut, shtim të emigrantëve dhe turistëve. Kjo ka sjellë edhe ngjarje rrugore që në perceptim kanë qenë të frikshme, fatale, të dhunshme. Impakti që krijuan në komunitet, në media ishte shumë i lartë. Puna e policisë rrugore nuk ka qenë e pakët, ka qenë masive, e palodhur. Kemi shtim të forcave. Po të marrim në krahasim me 2016, në 2015 e njëjtja periudhë më pak aksidente. Numri i aksidenteve ka qenë disi në rritje, jo në shifra alarmante. Numri i masave administrative kanë pësuar një ulje. Duhen forca më të ashpra goditëse, jo vetëm këshillimore. Në 10 drejtues vetëm 1 mund të ndëshkohet”, tha Dervishi.
Ai shtoi se Drejtoria e Përgjithshme për Sigurinë Publike ka hartuar një plan masash, ku edhe policia rrugore ka marrë pjesën e saj të përgjegjësisë.
“Në akset e zonave turistike, kemi shpërngulur efektivë policie nga zonat ku ka më pak ngjarje nga Lezha në Ksamil. Policia Rrugore nuk është e vetmja në këtë betejë dhe nuk duhet të jetë e vetmja. Po shohim që jemi të vetmit që po sulmohemi. Kodi rrugor e ka të shprehur qartë se cilët janë aktorët përgjegjës për uljen e aksidenteve. Duke nisur që nga Ministria e Arsimit deri tek entet rrugore”, tha ai.
Dervishi theksoi se përdorimi i celularëve një nga shkeljet thelbësore dhe më të rrezikshme. Ai evidentoi edhe problematikën e rrugëve.
“Rrjeti rrugor nuk është në lartësinë dhe cilësinë maksimale, në disa vende as normale. Kemi disa drejtues që vijnë nga jashtë ku respektojnë rregullat dhe gjithçka por kur vijnë këtu harrojnë që rruga nuk është në ato cilësi dhe sikur çlirohen nga zinxhirët. Rrugët këto janë, sinjalistika kjo është, policia rrugore ka një përgjegjësi të sajën për t’i konstatuar dhe adresuar problemet”, u shpreh eksperti i policisë rrugore.
Për sa i përket aksidentit me 4 jetë të humbura në Velipojë, Dervishi tha se nëse do të kishte barriera tek hidrovori, aksidenti nuk do kishte ndodhur.
“Aksi i fundit i Velipojës. Nuk thuhet gjëkundi që ka një hidrovor, që vjen një kthesë e rrezikshme. Nëse do kishte një barrierë mbrojtëse nuk do kishte ndodhur. Policia e Shtetit ka marrë masat dhe ka sistemuar tashmë, duke marrë inerte dhe goma dhe ka krijuar një barrierë, çka do të amortizojë çdo goditje të mundshme të ndonjë mjeti”, tha Dervishi.
Ai evidentoi rrugën kombëtare për në Fushë Krujë si një nga më të rrezikshmet.
