Policia Rrugore ashpërson masat ndaj drejtuesve të automjeteve që shkelin sinjalistikën rrugore, apo që nuk paguajnë gjobat e vëna. Kështu çdokush që ka gjoba pa paguar në një afat mbi 3 muaj, do t’i sekuestrohet automjeti dhe do t’i shitet në ankand.
Kjo është bërë e ditur nga drejtori i Policisë Rrugore Mit’hat Tola në një intervistë për gazetën “Shqip”.
Për të qenë të saktë, Policia Rrugore nuk ka lëshuar “ultimatum”, vetëm ka bërë detyrën e saj, duke kujtuar zbatimin e ligjit, dispozitën përkatëse të Kodit Rrugor. Në nenin 203 të Kodit Rrugor (më duhet ta citoj për të mos krijuar “keqkuptime”), sanksionohet fjalë për fjalë: 1. “… Të ardhurat nga masat administrative me gjobë për shkeljet e parashikuara nga nenet e këtij Kodi, paguhen nga kundërvajtësi brenda pesë ditëve nga dita që vendimi ka marrë formën e prerë. Pas kalimit të këtij afati, për çdo ditë vonesë, paguhet dy për qind kamatë deri në një muaj. Kur gjoba nuk paguhet ose nuk nxirret dot nga të ardhurat e shkelësit, për rastet e drejtuesit të mjetit me motor, bëhet ndalimi i mjetit deri në tre muaj dhe pas këtij afati bëhet shitja e mjetit me ankand, duke i dhënë diferencën në lekë shkelësit …”. thekson Tola
