Në Shqipëri ekziston një debat i hapur sa i takon arrestimit të grabitësve të energjisë. Një pjesë e madhe janë të varfër që nuk kanë mundësi likujdimi të faturave.
Por ky debat duket se është edhe në Itali. Një gjykatë atje ka dalë në konkluzionin se “ata që dëmtojnë rrjetin elektrik dhe abuzojnë me energjinë me pretendimin se nuk kanë para për të paguar faturat nuk kanë të drejtën e faljes pasi elektriciteti nuk është një e mirë jetike”.
Kështu arsyeton Gjykata e Kasacionit në Itali në vendimin e saj për konfirmimin e dënimit të një gruaje për vjedhje të energjisë elektrike në Pulja.
Gruaja ishte deklaruar si e papunë, me një vajzë shtatzënë dhe në gjendje pamundësie për të paguar përmes një lidhjeje të ligjshme energjinë elektrike.
Sipas gjyqtarëve, furnizimi me energji elektrike është një oportunitet por nuk e cënon jetesën. Sipas gjykatës, mungesa e energjisë elektrike nuk përbën një rrezik jetik për një person siç mund të jetë për shembull uji i pijshëm./a.m.
