Nëse merrni kuponin tatimor mund të fitoni një makinë, ja procedura
Në fushatën kundër evazionit fiskal, qeveria shqiptare po përdor vetëm ligjin, por edhe përfitimin që ka çdo kush e që fshihet pas ligjit. Qeveria portugeze ka mbi një vit që po përdor këtë metodë. Ajo ka organizuar një lotari mujore me kuponat tatimorë që marrin njerëzit, kur blejnë mallra dhe shërbime. Marrja e kuponave, tërthorazi, i detyron bizneset të paguajnë TVSH dhe tatim mbi fitimin në nivelin real.
Rezultati? Më shumë se 40 portugezë me fat janë sot pronarë të një AUDI me kilometrazh zero, ndërsa të ardhurat nga TVSH-ja janë rritur më shumë se 4% në një vit (563 milionë euro TVSH me shume). Gjatë kësaj kohe, konsumi është rritur vetëm 2%.
Ashtu si Greqia dhe vende të tjera jugeuropiane, Portugalia e ka shqetësim evazionin fiskal. E ashtuquajtura ekonomi gri përbën rreth 19% të Prodhimit të Brendshëm Bruto. Ashtu si Greqia, në vitin 2011, edhe Portugalia mori një paketë kredie nga Bashkimi Europian e nga FMN-ja, por arriti ta shlyejë shumën 78 miliardë euro qysh në majin e 2014-ës.
Për të rritur të ardhurat buxhetore, qeveria e Lisbonës ka marrë disa masa kundër evazionit fiskal. Ajo u ka ofruar skonto të taksave mbi të ardhurat personale atyre qytetarëve që dorëzojnë shumë kupona për të marrë pjesë në lotarinë e kuponave tatimorë.
Zyrtarët portugezë njoftojnë se, qysh kur filloi lotaria, numri i kuponave tatimorë të lëshuar u rrit me 26%. Ndërkohë, ndër 10 milionë portugezë, 40 prej tyre kanë fituar nga një AUDI A6.
Redaksia Java News/ f.g
