Drejtuesit e ekipit të Sopotit të Librazhdit kanë denoncuar në Komisariatin e Krujës se janë kërcënuar në hyrje të qytetit përpara ndeshjes me Pogradecin se nëse do të fitonin nuk do të dilnin të gjallë nga stadiumi, prandaj ndeshjen duhet që ta linin për liqenorët.
Lajmin e konfirmon për Shqiptarja.com administratori i ekipit të Sopotit, Liridon Bahiti. “Teksa ekipi po i drejtohej qytetit të Krujës në vendin e quajtur te ‘Pishat’ një makinë tip Fuoristradë i ka dalë përpara autobusit ku po udhëtonte ekipi duke e ndalur.
Tre persona të armatosur me mjete të ftohta si thika, shkopinj bejsbolli dhe shufra hekuri, madje sipas stafit njëri prej tyre kishte edhe armë kanë hyrë brenda në autobus dhe kanë kërcënuar ekipin se në rast fitoreje nuk do të dilnin të gjallë nga Kruja.
Personalisht nuk kam qenë në autobus, pasi isha duke udhëtuar me një tjetër makinë disa minuta më pas, por stafi dhe ekipi më informuan për gjithçka kishte ndodhur.
Dënojmë aktin e shëmtuar, që edhe në 1997 nuk ka ndodhur një gjë e tillë. Kemi depozituar kallëzimin në drejtorinë e policisë së Krujës dhe në përfundim të ndeshjes do t’i drejtohemi ambienteve të policisë për të dëshmuar atë që ka ndodhur.
Në një gjendje të tillë nuk jemi në gjendje që të luajmë, pasi presioni i ushtruar është i madh dhe situata nuk është aspak normale.
Uroj që autorët e kësaj ngjarje të shëmtuar të identifikohen dhe të vendosen sa më parë përpara drejtësisë për të marrë ndëshkimin e merituar”deklaroi ai për Shqiptarja.com.
Pogradeci dhe Luftëtari janë në garë për vendin e parë në grupin A në Kategorinë e parë dhe lufta për kalimin direkt në Superiore edicionin tjetër është më e fortë se kurrë.
Aktualisht Luftëtari i Gjirokastrës është 2 pikë përpara liqenorëve të Pogradecit dhe hapat fals kushtojnë shumë.
Theksojmë se ndeshja mes Sopotit dhe Pogradecit zhvillohet në qytetin e Krujës, pasi në Librazhd fusha nuk është në gjendje për të mirëpritur një ndeshje të Kategorisë së Parë për shkak të kushteve jo të përshtatshme. – See more at: http://shqiptarja.com/sport/2726/sopoti-denoncon-na-k-rc-nuan-n–kruj–po-humbi-pogradeci-do-vdisni-352036.html#sthash.TQYE1j1q.dpuf
