Patrick Clancy ka rrëfyer për herë të parë në detaje momentet tragjike që pasuan vrasjen e tre fëmijëve të tij nga ish-bashkëshortja, Lindsay Clancy. Në një intervistë për emisionin amerikan “60 Minutes” të CBS News, ai foli për gjendjen e saj mendore para ngjarjes, momentet kur gjeti fëmijët dhe katër ditët e fundit të jetës së djalit të vogël, Callan.
“Pika më e rëndë e sëmundjes së Lindsay erdhi në dhjetor. Ajo vuante nga mungesa e rëndë e gjumit, depresioni i thellë dhe mendime ndërhyrëse, përfshirë edhe mendime për vetëvrasje”, tregoi Patrick.
Sipas tij, problemet e Lindsay ishin shfaqur disa muaj pas lindjes së fëmijës së tretë. Ai rrëfeu se në tetor 2022 ajo kishte filluar të kishte net pa gjumë, ndërsa në dhjetor gjendja e saj ishte përkeqësuar ndjeshëm.
“Nuk i njihja sëmundjet mendore perinatale dhe nuk dija si t’i menaxhoja. Jam i sigurt se nuk i pashë shumë nga shenjat”, tha ai.
Në fund të dhjetorit, Lindsay u shtrua në spital për depresion dhe u lirua disa ditë më vonë. Më 7 janar, familja festoi ditëlindjen e vajzës së madhe, Corës.
Por pak ditë më vonë ndodhi tragjedia.
Patrick tregoi se atë mbrëmje kishte dalë nga shtëpia për të marrë darkën. Kur u kthye, gjeti bashkëshorten në oborr, pasi ajo ishte hedhur nga kati i dytë në një përpjekje për t’i dhënë fund jetës. Ajo kishte edhe plagë në qafë dhe në kyçe.
Më pas, ai zbriti në bodrum, ku gjeti tre fëmijët.
Cora dhe Dawson kishin vdekur tashmë, ndërsa Callan, vetëm tetë muajsh, ishte ende gjallë.
“Mbaj mend që mendova: ‘Të paktën një të ma lërë. Të paktën një fëmijë që mund ta rris me aq sa kam mundësi dhe që do t’i tregojë për motrën dhe vëllain e tij’”, rrëfeu ai.
Callan u transportua me helikopter në një spital në Boston, por gjendja e tij ishte kritike. Ai luftoi për jetën edhe katër ditë.
“Jam kaq mirënjohës për ato ditë. I kërkova falje, e mbajta fort në krahë dhe vdiq në duart e mia”, tha Patrick.
Pas ngjarjes, Patrick e pyeti Lindsay nëse e kujtonte se kishte vrarë fëmijët. Sipas tij, ajo i tha se gjithçka i ishte dukur si një ëndërr.
Gjatë procesit gjyqësor, avokatët e mbrojtjes deklaruan se Lindsay kishte treguar se, atë pasdite, ndërsa ishte vetëm në shtëpi me fëmijët, kishte dëgjuar një zë që i thoshte se kishte ardhur koha për të vrarë fëmijët dhe veten.
Mbrojtja ka argumentuar se Lindsay nuk ishte penalisht përgjegjëse për veprimet e saj për shkak të psikozës pas lindjes, nga e cila, sipas tyre, vuante pas lindjes së fëmijës së tretë.
Patrick, i cili ka dëshmuar edhe gjatë procesit, tha se kishte parë ndryshime të rëndësishme tek ish-bashkëshortja pas shtatzënisë së fundit. Ajo kishte pasur më parë probleme me ankthin dhe depresionin pas lindjes së dy fëmijëve të parë.
“Besoj se bëra më të mirën që mundesha me ato që kisha në dispozicion në atë kohë. Dhe jetoj me pasojat. Jetoj me to çdo ditë”, u shpreh ai.
Ai foli gjithashtu për akuzat në internet dhe teoritë konspirative që e paraqisnin atë si autorin e vërtetë të vrasjeve, edhe pse nuk është hetuar zyrtarisht për to.
Patrick tha se këto pretendime kanë qenë “thellësisht të dëmshme për trashëgiminë e fëmijëve të mi” dhe se e largojnë vëmendjen nga çështja e shëndetit mendor perinatal.
Ai pranoi gjithashtu se pas tragjedisë kishte menduar t’i jepte fund jetës.
“Nuk mendoja se do të arrija të bëhesha 35 vjeç. Dhe, në atë kohë, kjo nuk më shqetësonte aspak”, rrëfeu ai.
Në prill 2023, Patrick u zhvendos në New York, duke kërkuar të jetonte larg vëmendjes publike. Më pas njohu bashkëshorten e tij të dytë, Rachel Danis, me të cilën u martua në prill të këtij viti.
Çifti është aktualisht në pritje të një fëmije.
“Mezi pres t’u flas për vëllezërit dhe motrat e tyre”, tha Patrick.
Ndërkohë, Lindsay Clancy ndodhet në Tewksbury Hospital në Massachusetts. Procesi i saj i parë u anulua pasi juria nuk arriti të merrte një vendim unanim pas rreth 40 orësh diskutime.
Seanca e radhës është caktuar për 29 shtator, ndërsa mbetet për t’u parë nëse prokuroria do të kërkojë një proces të ri për vdekjen e tre fëmijëve.
