Etleva Nako, bashkëshortja e Romeo Nakos, i arrestuar më 30 nëntor të këtij viti, ka treguar për Gazetën Shqiptare ngjarjen si si i shoqi, në gjendje të dehur, qëlloi me kallashnikov djalin e tij 15-vjeçar, P. Nako. Gruaja 43-vjeçare rrëfen me detaje atë se çfarë ka ndodhur në familjen e saj rreth një javë më parë.
Ajo tregon se atë mbëmje kanë qenë për darkë në shtëpinë e vëllati të burrit, ku ky i fundit ka pirë më tepër se normalja dhe më pas janë kthyer në shtëpi. Nako mohon të ketë pasur ndonjë debat, madje familjarët kanë biseduar normalisht, si çdo natë.
“Nuk kemi bërë asnjë debat. Kemi bërë muhabet si çdo natë. Më pas mbaj mend që djali më ka kërkuar që t’i bëja disa kokoshka dhe kur i kam mbaruar ato jam ulur në një karrige për të pushuar. Nuk e di se si Romeo arriti deri në atë pikë sa të merrte armën dhe të qëllonte. Nuk e kam vënë re as kur ai është futur në dhomë me të. Mbaj mend vetëm që djali ka ardhur drejt meje dhe më ka thënë “kujdes mami” e më është hedhur në qafë. Kam dëgjuar vetëm të shtënat e armës dhe kam parë djalin që u shtri në tokë. Kam marrë djalin në krahë dhe kam dalë në oborr, pastaj një shok i tij na ka çuar deri në Spitalin e Korçës. Më pas nuk mbaj mend asgjë se çfarë ndodhi, pasi humba ndjenjat”, tregon nëna e të plagosurit.
Nako shton edhe se nuk ka pasur dijeni se në shtëpinë e saj kishte armë.
“Nuk e kam ditur asnjëherë se ne kemi pasur një armë apo fishekë në shtëpi. Nëse do e dija diçka të tillë, do të kisha bërë diçka që mos të ndodhte ajo që ndodhi. Nuk di çfarë të them. Nuk e di pse Romeo arriti të bënte diçka të tillë. Jemi një familje që nuk kemi pasur konflikte me njëri-tjetrin. Çdo gjë e zgjidhnim me qetësi”, thotë gruaja, e cila shpjegon se nuk ka komunikuar më me të shoqin që nga ngjarja.
E pyetur nga GSH nëse do të ishte në gjendje t’ia falte burrit veprimin e kryer, Etleva Nako përgjigjet vetëm me heshtje…
