33-vjeçarja, nënë e tre fëmijëve në Durrës, e divorcuar prej pesë vitesh, e cila është denoncuar nga ish-vjehrra për mungesë kujdesi ndaj të miturve, deklaroi se nuk do t’i braktisë fëmijët e saj dhe nuk do të lejojë që ata të dërgohen në jetimore.
Në një lidhje të drejtpërdrejtë për emisionin “Në Kohë Reale”, në moderimin e Flori Gjinit, ajo u shpreh se gjendja është e mirë dhe se ndodhet pranë fëmijëve të saj.
“Jetoj prej 15 vitesh në Durrës dhe jam e divorcuar prej 5 vitesh. Jam me fëmijët dhe gjendja është shumë e mirë. Nuk kam asnjë kontakt me ish-bashkëshortin, as me gjyshen e fëmijëve. Kur vjen në Shqipëri, ajo kërkon të takojë fëmijët. Fëmijët e mi nuk kanë marrëdhënie të keqe me gjyshen dhe ia kanë hapur derën. Fëmijët e takojnë gjithmonë gjyshen kur vjen në Shqipëri,” deklaroi ajo.
Më tej, 33-vjeçarja theksoi se marrëdhëniet me ish-vjehrrën nuk kanë qenë të mira, por kontaktet kanë qenë vetëm për hir të fëmijëve.
“Me ish-vjehrrën nuk kam pasur marrëdhënie të mirë, kontaktet kanë qenë vetëm për fëmijët. Nuk do t’i lë fëmijët të shkojnë në jetimore. Punoj edhe me dy turne. Çdo darkë jam pranë fëmijëve. Ata shkojnë në shkollë dhe nuk kanë pasur probleme. Ia kam lënë policisë dhe organeve përkatëse të merren me zbardhjen e çështjes,” u shpreh ajo.
Nga ana tjetër, ish-vjehrra, e cila ishte gjithashtu në një lidhje për emisionin “Në Kohë Reale”, hodhi pretendimin se djali i saj është i aftë të mbajë fëmijët ndërsa tha se do të ngrejë pretendim që fëmijët t’i kalojnë atij.
“Unë jetoj në Itali. Nuk kam folur me nënën e fëmijëve, pasi sapo kisha ardhur nga Italia dhe nuk kisha numër. Erdha për një fatkeqësi. Të dielën mendova të shkoj t’i vizitoj, pasi mendova që edhe ish-nusja do të ishte në shtëpi me fëmijët. Sapo u futa në derë, më mbyti era e keqe, kur pashë shtëpinë në atë gjendje.
Për herë të fundit kam qenë para një viti me djalin. Edhe para një viti ka qenë kështu situata. Lajmërova edhe nënën e saj që nuk mban shtëpinë dhe fëmijët. I thashë që do t’i bëja ndonjë video dhe do t’i hapja punë. Djali e ka paguar gjithmonë kuotën prej 180 mijë lekësh.
Nusja thotë që nuk i del koha të mbajë shtëpinë. Nusen e kam marrë në punë në Itali, ka ardhur dhe ka ikur herë pas here. Ka 5 vite që është ndarë nga djali. Djali është i aftë të mbajë fëmijët. Do të ngre pretendim që fëmijët t’i marrë djali, ose dy fëmijë t’i japë mua dhe të mbajë vajzën. Kur të dojë, të vijë t’i vizitojë në Itali”, tha ajo.
